ЦХИНВАЛ, 29 июн — Sputnik. Инциденттæ ма æруадзын æмæ сæ иуварс кæныны механизмы фæлгæтты (ИÆАМ) форматы фембæлды Хуссар Ирыстоны делегаци рахаста, Гуырдзыстоны уæвæг ЕЦЦМ æмæ тыхон структурæты минæвæрттæ арæныл æнæзакъононæй кæй хизынц, уыцы фарст. Уый тыххæй журналисттæн фехъусын кодта хуссарирыстойнаг делегацийы сæргълæууæг Санахъоты Дауыт.
"Уынаффæты сæйрагдæр пункттæй иу ссис арæнсæттыны цаутæ æрмæст арæнгæрон территориты хуымæтæг цæрджыты нæ, фæлæ ма Гуырдзыстоны уæвæг ЕЦЦМ æмæ тыхон структурæты минæвæртты æрдыгæй", — загъта Санахъоты Дауыт.
Фембæлды хайадисджытæ ма æрдзырдтой паддзахадон арæны хахх банысан кæныны фарстытыл.
"Гуырдзыстоны къухдариуæгад арæны демаркаци æмæ делимитацийы къамис кæй нæ разы кæны аразын, уый тыххæй хуссарирыстойнаг фарс иуæрдыгæй бæлвырд кæны арæны хахх. Мах æрдзырдтам арæн банысан кæныныл, арæны хаххыл амонæгтæ сæвæрыныл. Ныфс нæ ис æ мæ Гуырдзыстон бамбардзæн, кæй хъæуы саразын ацы къамис", — загъта Дауыт.
Уый ма банысан кодта, Хуссар Ирыстоны фарс дарддæр дæр кæй æвæры арæны цыды тыххæй амонæгтæ. Хицæн фадгуытыл арæх бахъæуы ивын хæлд амонæгтæ ногтыл.
Санахъоты Дауыт бахахх кодта, гуырдзыстойнаг къухдариуæггæнджытæ кæй хъуамæ бамбарын кæной цæрджытæн ахæм архайдтыты зианы тыххæй, уымæн æмæ арæнгæрон информацион амонæгтæ æмбарын кæнынц арæнгæрон территориты цæрджытæн, кæуылты цæуы арæн æмæ ахъаз у уый ма фехалынæн.
ИÆАМ форматы раздæры фембæлдæй фæстæмæ Хуссар Иры арæнхъахъхъæнджытæ æрцахстой 37 арæнсæттæджы, уыдонæй 25 уыдысты Гуырдзыстоны æмбæстæгтæ.
"Хуссар Ирмæ нырма ис æртæ гуырдзыстойнаг æмбæстаджы. Иннæтæ æмбæлон тæрхондонон процедурæтæ рацæуыны æмæ административон ивар бафидыны фæстæ феддæдуар æрцыдысты Гуырдзыстоны территоримæ", — загъта хуссарирыстойнаг минæвар.
Хуссарирыстойнаг фарс ма равдыста катай Гуырдзыстоны æфсæддон базæты æфсæддон ахуыртæ уадзыны фæдыл.
"Мах тасы æфтауы, ахæм ахуыртæй кæй спайда кæндзысты нæ сабыр цæрджыты ныхмæ, куыд 2008 азы, афтæ", — загъта Санахъоты Дауыт.
ИÆАМ форматы радон фембæлд уагъд æрцæудзæн 19 июлы.
