ЦХИНВАЛ, 1 июл — Sputnik. Хуссарирыстойнаг студенттæ хайад исынц æппæтуæрæсейаг форум "Таврида-2016"-йы, кæцы йæ куыст райдыдта майрæмбоны Хъырымы.
Фæсивæдон полтикæ, спорт æмæ туризмы комитеты минæвар Хъуылымбегты Александр радзырдта Sputnik, форумы фыццаг къорды кæй архайынц музыкалон коллективтæ. Хуссар Ирæй форумы хайад исынц зарæггæнджытæ Тедеты Татьяна, Кокойты Зарина æмæ Гаглойты Алана.
Форумы организатортæ ныфс дæттынц, хайадисджытæн кæй уыдзæн фембæлдтæ зынгæ музыканттæ æмæ Уæрæсейы сгуыхт артисттæ, эксперттæ æмæ цытджын уазджытимӕ. Фæсивæдмæ æнхъæлмæ кæсы хъæзныг ахуырадон нывæзт æмæ гранттæ рамбулыны фадӕттæ.
"Не ‘взонг хайадисджытæ равдисдзысты музыкалон æмæ кӕфтыты номыртæ. Уыдон архайдтой "Тавриде-2015" дӕр, фæлæ уæд хайадисджытæ нæ уыдысты. Ивгъуыд аз нӕ фӕсивӕд тынг фæцыдысты организаторты зæрдæмæ æмæ сæ ныр æрхуыдтой, куыд æххæстбарджын хайадисджытæ", — загъта Хъуылымбегты Александр.
Хуссарирыстойнаг хайадисджытæ бацæттæ кодтой ног проект "Студии современных танцев".
Композиторты æмæ хореографты сменӕ ахæсдзæн 7 июльмæ. Иумӕйагæй форум йæ куыст фæуыдзæн 24 августы.
