ЦХИНВАЛ, 15 июл — Sputnik. Развӕлгъау информацимӕ гӕсгӕ, Францы цӕрӕг ирӕттӕй Ниццӕйы теракты рӕстӕджы ничи баййӕфта зиан, фехъусын кодта Sputnik ирон ӕхсӕнадты ассоциаци "Сæндидзæн" ("Ренессанс") Парижы сӕргълӕууӕг Хъесаты Борис.
84 уды ахӕссӕг теракт ӕрцыд Ниццӕйы дысон ӕхсӕвы Бастилийы сисыны бӕрӕгбон нысан кӕныны рӕстӕджы. Фӕмардуӕвджыты ӕмӕ зианбаййафджыты ӕхсӕн ис бирӕ фӕсарӕйнаг ӕмбӕстӕгтӕ, уыдон нымӕцы уырыссӕгтӕ.
"Мӕхӕдӕг Парижы цӕрын ӕмӕ ӕнамонд хабары тыххӕй базыдтон ӕрмӕстдӕр райсомӕй. Нырма ницы бӕлвырд информаци ис, амӕттӕгты ӕхсӕн ирӕттӕ ис ӕви нӕ. Фӕлварын Ниццӕйы цӕрӕг зонгӕтӕм телефонӕй бадзурын", — загъта Хъесаты Борис.
Sputnik ма фӕдзырдта цалдӕр иронмӕ, кӕцытӕ цӕрынц Францы. Уыдон фехъусын кодтой, сӕхиуыл дӕр ӕмӕ сӕ зонгӕтыл дӕр кӕй ницы бӕллӕх ӕрцыд.
Французаг горӕт Ниццӕ цыппӕрӕмы изӕрӕй ӕрцыд террористон акт. Адӕм ӕрӕмбырд сты денджызы былгӕрон, цӕмӕй бакӕсой Бастилийы сисыны бонмӕ бӕрӕгбонон фейерверк. Бынӕттон рӕстӕгмӕ гӕсгӕ, 22.30 сахатмӕ ӕввахс (23.30 мск) адӕмы къордыл алӕгӕрста уӕзласӕн машинӕ. Цæстæйфенджыты ныхӕстӕм гӕсгӕ, хъуыстис ӕхст.
Теракты фӕмард 80 адӕймаджы, 120 та райстой цӕфтӕ. Уӕзласӕн машинӕйы шофыры аиуварс кодтой. Францы президент ацы ӕбуалгъ хабар схуыдта теракт.
