ЦХИНВАЛ, 27 июл — Sputnik, Босыкты Наталья. Фильм "IRON VANDEE" равдисдзысты Цӕгат Ирыстоны, загъта ирон адӕмы геноциды тыххӕй фильмы режиссер Мамиты Григорий Sputnik мультимедион фӕзуатыл пресс-конференцийы рӕстӕджы.
Киноныв "IRON VANDEE"-йы премьерӕ уагъд ӕрцыд Цхинвалы кинотеатры дыццӕджы, ӕртыццӕджы та фильмы режиссер йӕ коллегӕтимӕ ӕрбацыд Sputnik пресс-центрмӕ, цы ран дзуапп раттой журналистты фарстытӕн.
Режиссер радзырдта, цӕмӕн схуыдтой афтӕ киноныв, кӕцыйы нысаниуӕг кӕсджытӕн ӕмбӕрстгонд свӕййы бакасты фӕстӕ.
"Киноныв арӕзт ӕрцыд Валикъо Джугъелийы боныджы бындурыл, ӕмӕ йӕ сфӕнд кодтам схонын "IRON VANDEE". Йӕ боныджы фыстыты Джугъели арӕх барста Хуссар Ирыстоны французаг Вандеяимӕ. Фильмы ном хӕссы дыдзæхсæн нысаниуӕг ӕмӕ йын ратӕлмац гӕнӕн ис, куыд ирон Вандея, афтӕ æндон Вандея дӕр",- загъта режиссер.
Режиссер банысан кодта, кӕй уын ӕнцон сфидар кӕнын актерон сконд. Фӕлтӕрдджын ӕмӕ профессионалон актертӕй дарддӕр, фильмы хъазынц Цхинвалы ӕндӕр ӕмӕ ӕндӕр скъолаты уӕлдӕр классты ахуыргӕнинӕгтӕ.
"Мӕ хъуыдымӕ гӕсгӕ, ацы сывӕллӕттӕ хорз сӕххӕст кодтой, сӕ разы сын цы хӕстӕ ӕрӕвӕрдтам, кӕд профессионалтӕ не сты, уӕддӕр",- бафиппайдта Мамиты Григорий.
РХИ сгуыхт актер Бибылты Сослан, кӕцы ахъазыд Валикъо Джугъелийы роль, банысан кодта йӕ персонажы ӕгъатырдзинад Хуссар Ирыстоны ныхмӕ.
"Цалынмӕ фильмы нӕ райдыдтон хъазын, уӕдмӕ бакастӕн чиныг иууылдӕр, цӕмӕй бамбарон, цы адӕймаг уыд, цы йӕ разӕнгард кодта. Уый ӕрмӕст Хуссар Ирыстонмӕ нӕ ӕрвыстой, фӕлӕ сомихаг ӕмӕ абхазаг фронтты ахӕм ӕгъатырдзинад не вдыста, куыд Хуссар Ирыстоны. Ам ӕй фӕндыд алкӕйдӕр ӕмӕ алцыдӕр скуынӕг кӕнын",- загъта актер.
Уымӕ ӕнӕкӕсгӕйӕ, фильмы ирон адӕмы знаджы ахъазын уымӕн зын нӕ уыд.
Джугъелийы фыдракӕндтӕм ӕнӕкӕсгӕйӕ, кинонывы хайадисджытӕ банысан кодтой, боныгӕн кӕй ис стыр аргъ, куыд зынаргъ историкон ӕвдисӕндар ирон адӕмы ныхмӕ.
Мамиты Григорийы ныхӕстӕм гӕсгӕ, ӕввахс рӕстӕджы киноныв равдисдзысты Цӕгат Ирыстоны дӕр.
"Кӕд, уый нырма дырысӕй бӕлвырд нӕу. Ныртӕккӕ уагъд цӕуынц бадзырдтӕ телеканал "Алания"-имӕ. Ныфс мӕ ис,т агъд рӕстӕджы телекӕсджытӕ кӕй бакӕсдзысты нӕ кинонывмӕ",- загъта режиссер.
Ӕрыгон режиссер ма фӕнд кӕны ноджы иу фильм сисын — ныр та 2008 азы цауты тыххӕй.
"Куыд алы хуссарирыстойнаг артист, афтӕ мӕнмӕ дӕр фӕндтӕ ӕмӕ хъуыдытӕ бирӕ ис, проблемӕ ис ӕрмӕстдӕр финансты мидӕг. Гъӕдджын кино сисынӕн чысыл ӕхца нӕ хъӕуы, кӕцы стӕй ӕвдыст цӕуид Ирыстонӕн ӕдде",- банысан кодта режиссер.
Уымӕй дарддӕр ма режиссеры сфӕлдыстадон нывӕзтты ис республикӕйы киностуди саразын, цы ран профессионалтӕ аразиккой хорз цы хъуыддаг зонынц аразын, уый.
"Кӕй зӕгъын ӕй хъӕуы, киностуди хъӕуы. Ирыстоны ис бирӕ курдиатджын актертӕ, оператортӕ ӕмӕ режиссертӕ, хорз кинотӕ исынӕн", — загъта режиссер.
