ЦХИНВАЛ, 28 июл — Sputnik. Цхинвалы райдыдтой исын куыстытӕ сывӕллӕтты къамты конкурсмӕ "Нӕ сабитӕ", фехъусын кодта Sputnik конкурсы организатор Джиоты Аэлита.
Конкурсмӕ бавдисӕн ис 1-13 азы кары сабиты нывтӕ. Чысыл хурты иууыл хуыздӕр хуызисттӕ ӕвзардзысты телекӕсджытӕ SMS-хъӕлӕсдӕттыны руаджы.
"Уӕлахидзаутӕ уыдзӕн кӕстӕр(1-8 азы) ӕмӕ хистӕр(8-13 азы) кары категориты. Конкурсы хайадисӕг къамтӕ ӕвдыст цӕудзысты ПТРК "Ир"-ы эфиры сӕрмагонд программӕйы", — загъта Джиоты Аэлита.
Уый ма банысан кодта конкурсы домӕнмӕ гӕсгӕ къамтыл ма хъуамӕ уа сӕрмагонд программӕты ӕндӕвдад.
"Компьютерон программӕтӕй цы къамтыл бакуыст ӕрцӕуа, уыдон конкурсӕй аиуварс кӕндзыстӕм. Хайадисӕг къамтӕн аргъгӕнӕг уыдзӕн телекӕсӕг SMS-хъусинӕгты руаджы. Республикӕйы чысыл хурты иууыл рӕсугъддӕр къамтӕ равзарыны конкурс цӕудзӕн иу мӕйы дӕргъы", — бафтыдта йӕ ныхӕстӕм организатор.
Уый ма бафиппайдта, мадзалы нысан кӕй у адӕмы ӕнкъарддзинад фӕсурын ӕмӕ сӕ хъусдард аздахын ӕвӕрццаг цаутӕм.
Сабиты къамты конкурс арӕзт цӕуы ПТРК "Ир"-ы ӕмархайдӕй. Фотоконкурсы фыццаг алӕвӕрдтӕ эфиры фӕзындзысты ӕрбалӕугӕ мӕйы ӕмбисы.