ЦХИНВАЛ, 28 июл — Sputnik, Хъотайты Мария. Райсом Цхинвалы сывӕллӕтты поликлиникӕйы ӕрӕмбырд ис стыр рад СЦП-ӕй рынчын сывӕллӕттӕ ӕмӕ ныййарджытӕй. Ардӕм сӕ ӕрбахуыдтой змӕлдимӕ проблемӕтӕ коррекцийы цӕгатирыстойнаг центры бӕрзондквалификацион дохтыртӕ-неврологтимӕ консультацимӕ, центры директор, дохтыр-физиотерапевт Чеджемты Ноннӕйы сӕргълӕудӕй.
Центр ӕрбайгом Цӕгат Ир столицӕйы фарон, ифтонг у нырыккон медицинон техникӕйӕ ӕмӕ фӕлвары раззагондӕр методтӕ "сывӕллӕтты церебралон паралалич"-ӕй рынчын сывӕллӕттӕн хос кӕныны хъуыддаджы.
Ӕввахс дыууӕ мӕйы сывӕллӕтты церебралон параличӕй рынчын хуссарирыстойнаг сывӕллӕттӕ рацӕудзысты ӕртӕкъуырион ӕнӕаргъ реабилитацион курс змӕлдимӕ проблемӕтӕ коррекцийы цӕгатирыстойнаг центры. Ӕмрӕстӕджы центры реабилитаци цӕуыны фадат ис ӕрмӕст дыууын сывӕллонӕн, уымӕ гӕсгӕ акци ацӕудзӕн цалдӕр этапӕй.
Стыр радмӕ ӕнӕкӕсгӕйӕ, дзӕуджыхъӕуккаг дохтыртӕ алы пациенты дӕр сгарынц лӕмбынӕг. Иу пациенты консультацийыл 20 минутӕй къаддӕр нӕ ацӕуы. Медиктӕ фӕнысан кӕнынц ныййарджыты контакттӕ, цӕмӕй сӕм фӕстӕдӕр фӕдзурой ӕмӕ сӕ фӕхоной центры реабилитаци рацӕуынмӕ.
Центры директор Чеджемты Ноннӕйы ныхӕстӕм гӕсгӕ, Центр иу аз дӕр нӕма кусы ӕмӕ сӕрмагондӕй арӕзт ӕрцыд "СЦП" диагнозимӕ сывӕллӕтты реабилитацийӕн.
"Цхинвалы уыдзыстӕм иу бон. Уыцы рӕстӕг мах бафӕлвардзыстӕм куыд фылдӕр пациентты басгарынц. Хосгӕнынад кӕй хъӕуы, уыдон фӕхондзыстӕм реабилитацийы курсытӕ рацӕуынмӕ нӕ центрмӕ. Ацы сывӕллӕтты ӕрмӕст медицинон ӕмӕ психологон ӕххуыс нӕ хъӕуы, фӕлӕ ма социалон адаптаци дӕр", — загъта Чеджемты Ноннӕ.
СЦП-ӕн ӕххӕстӕй тынг стӕм хатт ис гӕнӕг схос кӕнын, фӕлӕ уӕддӕр хъӕуы буарӕн ӕххуыс кӕнын — уый тыххӕй центры пайда кӕнынц нырыккон методтӕй, уый нымӕцы иппотерапи (бӕхтыл тезгъо кӕнын), массаж, арт-терапи, хосгӕнӕн физкультурӕ, физиотерапи ӕмӕ доны терапи.
"Центры ма ис стоматолог ӕмӕ логопед. Реабилитацийы курс адард вӕййы ӕртӕ къуыри",- загъта центры директор.
Пациентты ныййарджытӕн Центры цур ис уазӕгдон. Сывӕллӕттӕн хоскӕнынад уыдзӕн ӕнӕаргъӕй, ныййарджытӕ дӕр уазӕгдоны цӕрдзысты ӕнӕаргъӕй.
Цхинвалы сывӕллӕтты поликлиникӕйы сӕйраг дохтыр Хӕныкъаты Ларисӕйы ныхӕстӕм гӕсгӕ, "фыццаг хатт хуссарирыстойнаг сывӕллӕттӕ ацӕудзысты ахӕм нырыккон ӕмӕ эфективон хоскӕнынад исынмӕ".
Ӕдӕппӕт Хуссар Ирыстоны ис 44 сывӕллоны "СЦП" диагнозимӕ.
"Ацы нымӕцӕй 23-йы хъӕуы бӕрзондквалификацион хоскӕнынад. Нӕ сабитӕн специалистты консультаци у хорз фадат дарддӕры реабилитацийы курс рацӕуынӕн. Ууыл ныллӕууыдысты центры специалисттӕ сӕхӕдӕг. Мах сын радтам ахӕм диагнозимӕ сывӕллӕтты номхыгъд", — загъта Хӕныкъаты Ларисӕ.
