ЦХИНВАЛ, 4 авг — Sputnik. УФ УУМ-ы сапертӕ, кӕцытӕ ӕрцыдысты Хуссар Ирыстоны территори минӕтӕй ссыгъдӕг кӕнынмӕ, ныридӕгӕн ссыгъдӕг кодтой рӕмудзӕн ӕрмӕджытӕй 40 гектарӕй фылдӕр, хъусын кӕны УФ УУМ-ы пресс-службӕ.
30 адæймаджы — уæлдай тасӕй ирвæзынгæнæн операцитæ уадзыны центр "Лидер"-ы кусджытæ æрцыдысты Хуссар Ирыстонмæ июны райдайӕны ӕмӕ ӕвӕстиатӕй ӕрӕвнӕлдтой куыстытӕм Ереды хъӕуы территорийыл. 80 бонмӕ УФ УУМ-ы саперты раз уыд ӕвӕрд нысан — Хуссар Ирыстоны 40 га ссыгъдӕг кӕнын. Ацы хӕслӕвӕрд уыдон сӕххӕст кодтой ӕмгъуыдӕй раздӕр.
"Центр "Лидер"-ы специалисттӕ дарддӕр уадзынц пиротехникон куыстытӕ, кӕцытӕ сты баст Хуссар Ирыстоны территорийыл рӕмудзӕн ӕрмӕджыты бацагуырд ӕмӕ ӕнӕзианхъом скӕнынимӕ. Басгӕрстгонд территорийы иумӕйаг фӕзуат у 40, 009 га", — загътой пресс-службӕйы.
Куыстыты рӕстӕджы сапертӕ ссардтой ӕмӕ ӕнӕзианхъом скодтой 180 рӕмудзӕн ӕрмӕджытӕ, уыдон нымӕцы минӕтӕ, гранатӕтӕ, минӕхсӕг ӕмӕ артиллерион нӕмгуытӕ, гранатӕтӕ ӕмӕ алыгъуызон калибры нӕмгуытӕ.
Къуыри дыууӕ хатты уӕрӕсейаг специалистты фарс балӕууынц Хуссар Ирыстоны УУМ-ы кусджытӕ, уыдонӕн пиротехникон куыстыты бынаты уагъд ӕрцӕуынц ахуыртӕ.
Ацы куыстытæ æххæст цæуынц Хуссар Ирыстон æмæ Уæрæсейы президентты æхсæн бадзырдты æмæ дыууæ бæстæты УУМ-ы æмгуыстады нывӕзттӕм гӕсгӕ.
