ЦХИНВАЛ, 5 авг — Sputnik. Хуссарирыстойнаг ветеринартӕ арвыстой экспертизӕмӕ Стъаврополмӕ мард фосы уæфты фыццаг хуызӕгтӕ, фехъусын кодтой Sputnik хъӕууон хӕдзарады министрады пресс-службӕйы.
Хуссар Ирыстоны Дзауы районы ӕбӕрӕг рын цӕгъды хӕдзарон фосы. Районы ветеринарон службӕйы развӕлгъау бӕрӕггӕнӕнтӕм гӕсгӕ хуытӕ мӕлынц африкӕйаг емынӕйӕ.
"Ветеринарон службӕ бӕлвырд кӕны Хуссар Ирыстоны фос цӕмӕй скъуыйынц, уый аххосӕгтӕ. Ветеринартӕ сгарынц фосы мӕрдтӕ, уагъд цӕуы ветеринарон-санитарон экспертизӕ. Уыдон ӕвзарынц хуызӕгтӕ африкӕйаг емынӕ сбӕлвырд кӕныны фӕдыл экспертизӕ ауадзынӕн, фыццаг парти ныридӕгӕн ӕрвыст ӕрцыд Стъавраполы ветеринарон лабораторимӕ", — загътой пресс-службӕйы.
Кӕд ӕмӕ экспертизӕ сбӕлвырд кӕна ветеринарты ӕнхъӕлцтӕ, хуытӕ африкӕйаг емынӕйӕ кӕй мӕлынц, уӕд республикӕйы баконд ӕрцӕудзӕн карантин, цавӕрдӕр рӕстӕг нӕ уыдзӕн хуыйы фыд уӕй кӕныны бар.
Ведомствойы нырма нӕй бӕлвырд зонӕнтӕ рынчын фосы нымӕцы тыххӕй, уымӕн ӕмӕ фермертӕ, ӕнӕмӕнгхъӕуындзинадмӕ ӕнӕкӕсгӕйӕ, нӕ хъусын кӕнынц ветеринарон службӕтӕм.
"Африкӕйаг емынӕйӕ фӕрынчыны ныхмӕ хъуамӕ ист цӕуой карз мадзӕлттӕ фермӕты фос хицӕнтӕй дарыны фӕдыл, ӕндӕр хъӕуты фосимӕ контакт ма ′руадзын, фос иу бынатӕй иннӕмӕ хъуамӕ конд цӕуа ӕрмӕстдӕр районы ветеринарон службӕйы разыдзинадӕй", — загътой пресс-службӕйы.
Хуссар Ирыстоны африкӕйаг емынӕ фӕзынд 2010 азы кӕрон. Уӕд республикӕйы хуыйы мыккаг рын ныццагъта. Фӕстӕдӕр республикӕйы цӕрджытӕн африкӕйаг емынӕйӕ цы фос ныццагъды ис, уыдон ныхмӕ радтой фыстӕ.
