ЦХИНВАЛ, 8 авг — Sputnik. Цӕгат Ирыстоны сӕргълӕууӕджы хӕстӕ рӕстӕгмӕ ӕххӕстгӕнӕг Битарты Вячеслав ӕрӕрвыста Тыбылты Леонидмӕ фыдохы тел республикӕйы ныхмӕ Гуырдзыстоны ӕфсӕддон агрессийыл аст азы сӕххӕсты фӕдыл.
Хуссар Ирыстоны мысынц 2008 азы августы цаутӕ. Цхинвалы уагъд цӕуынц мысӕн мадзӕлттӕ, хайад сӕ исынц республикӕйы къухдариуӕгад ӕмӕ цӕрджытӕ, афтӕ ма аст азы размӕ ацы зӕххыл цы уӕрӕсейаг солдаттӕ фӕмард сты, уыдон ныййарджытӕ.
"Стыр зӕрдӕхъыгӕй Цӕгат Ирыстоны мысынц 2008 азы августы хӕст — уӕд Хуссары сабыр, фынӕй горӕттӕ ӕмӕ хъӕуты цӕрджытӕ фесты карз ӕхст бын. Ныппырх сты рынчындӕттӕ, сабидӕттӕ, скъолатӕ, культурӕйы объекттӕ, цӕрӕн кварталтӕ. Уӕрӕсейы къухдариуӕгады цӕстфӕныкъуылдон реакци, бархъомыс ӕмӕ уӕндондзинад, афтӕ ма уӕрӕсейаг солдатты хъайтардзинады фӕрцы знагӕн йӕ фӕндтӕ йӕ хъуыры фӕбадтысты", — дзырдӕуы Битары фырты телы.
Уый банысан кодта, Хуссар Ирыстоны зӕххыл сабырады сӕраппонд сӕ удтӕ чи радта, уыдон рухс нӕмттӕ кӕй никуы уыдзысты рох, "нӕ хӕс у, цӕмӕй уыцы хъайтартӕн бузныг адӕттӕм фӕлтӕрӕй фӕлтӕртӕм".
Цӕгат Ирыстоны цӕрджыты номӕй Битарты Вячеслав загъта Тыбылты Леонид ӕмӕ республикӕйы адӕмӕн сабырад, размӕцыд ӕмӕ рухс фидӕны фӕндиӕгтӕ.
