ЦХИНВАЛ, 12 авг — Sputnik, Козаты Дианӕ. Цхинвалы мэрияйы цур ахуырады управлени расидт конкурс иууыл популярондӕр скъолатӕй иу — № 2-ӕм скъолайы директоры бынатмӕ, фехъусын кодта Sputnik управленийы сӕргълӕууӕг Джиоты Агуындӕ.
Ныры директор Абайты Сослан ӕртӕ хатты фыста йӕ бынат ссӕрибар кӕныны фӕдыл куырдиат, фӕлӕ цалынмӕ ног директоры снысан кӕной, уӕдмӕ къухдариуӕгад дӕтдзӕн скъолайӕн.
"Ног ахуыры азмӕ ма баззад нымад бонтӕ ӕмӕ сӕвзӕргӕ уавӕр хынцгӕйӕ, горӕты ахуыры управлени расидт документты райст №2-ӕм астӕуккаг скъолайы директоры бынатмӕ кусынмӕ бацӕуыны тыххӕй", — загъта Джиоты Агуындӕ.
Уый радзырдта, скъолайы коллектив раздӕр кӕй бавдыста кандидатурӕ, кӕцы банымадта хорзыл горӕты ахуырады управлени дӕр ӕмӕ ахуырады министрад дӕр. Фӕлӕ ахуыргӕнӕг не ′сразы ацы бынаты ӕрлӕууын.
Джиоты Агуындӕ банысан кодта, конкурсмӕ документтӕ ист кӕй цӕудзысты 16 августы онг. Кӕй фӕнды ацы бынаты кусын, уыдон ма иннӕ документтимӕ хъуамӕ ӕрбавдисой лӕмбынӕг резюме, цӕмӕй уагдоны зоной, иу кӕнӕ иннӕ претендент гӕнӕн ис ӕмӕ скъолайы сӕргъ лӕууа ӕви нӕ.
Горӕты ахуырады управленийы сӕйраг домӕныл нымайы суинаг директоры кар — кандидатыл 60 азӕй фылдӕр хъуамӕ ма цӕуа.
"Тынг ахсджиаг ахаст нын ис ацы фарстмӕ. Скъолайы директоры бынатмӕ кандидат ма рацӕудзӕн аттестаци ахуырады министрады", — бафтыдта Джиоты Агуындӕ.
Горӕты ахуырады управлени ахӕм конкурс расидт фыццаг хатт, раздӕр Ахуырады министрады цур куыста къамис, кӕцы ифтонг кодта куысты бынӕттӕй ахуырады къабазы кусджыты.
