ЦХИНВАЛ, 25 авг — Sputnik, Плиты Фатимӕ. Хуссар Ирыстоны Уæлвæткон уавæрты министрады специалисттæ сгарынц, республикæйы ахуыргæнæндæтты зынгирвæзт æмæ æмбæстгонд æдасдзинады нормæтæ куыд æххæст цæуынц, уый, фехъусын кодта цыппæрæмы Sputnik УУМы зынгирвæзты фӕдыл цæстдарды хайады хистæр Гæбæраты Таймураз.
УУМ басгæрстытæ цæуынц 20 августӕй ӕмӕ адарддӕр уыдзысты 1 сентябрьмӕ. Специалисттӕ бæрæг кæнынц, скъолаты ӕмӕ сабидӕтты зынгирвæзты ныхмæ тохы æмæ æмбæстагон æдзасдзинады нормæтæ ‘ххӕст цӕуынц ӕви нӕ.
"Сгæрст цæуынц ахуыргæнæн хатæнтæ, уæлхæдзæрттæ, ныккæндтæ æмæ агъуысты алфамблай территоритӕ. Зæгъæм, нормæтæм гæсгæ, ныккæндӕн хъуамæ уа æфсæндуар, уа дзы сынтӕджытӕ, медикаменттæ æмæ донифтонгад, цæмæй дзы экстремалон уавæрты сабиты бааууон кæной", — банысан кодта Гæбæраты Таймураз.
Йӕ ныхӕстӕм гӕсгӕ, ацы æмæ æндæр ӕнӕмӕнгхъӕуӕг нормæтæ басгӕрстгонд уагдӕттӕй стæмты сты нывыл.
"Цы сабидæттæ æмæ скъолаты бакуыстой нæ специалисттæ, уыдонæй, хъыгагæн, нормæтæн дзуапп дæттынц æрмæстдæр гимнази "Альбион", Дменис æмæ Дзауы рæвдауæндæттæ æмæ Цхинвалы æртыккæгæм сабидон "Зæрватыкк", — загъта министрады кусæг.
УУМы специалисттæ ахуырадон уагдæттæ сгарынц аз дыууæ хатты — ног ахуыры азы къæсæрыл æмæ Ног азы размæ. Специалисттæ цы фæткхалды цаутыл фембæлынц, уыдон аиуварс кæнынæн раттынц æмгъуыд 1 — 1,5 азы. Уыцы рӕстӕгмӕ ахуыргæнæн уагдæтты нормæтæ æххæст куыннæ ӕрцæуой, уæд министрадӕн бар ис объект сæхгæнын.
Уымӕй дарддӕр ма Гæбæраты Таймураз радзырдта, ахуыргæнæн уагдæтты сæ специалисттæ сывæллæттæ æмæ ахуыргæнджытæн кӕй уадздзысты теоретикон æмæ практикон ахуыртæ дæр.
"Фидарæй хъæуы зонын, эвакуацийы рæстæджы куыд хъæуы хидарын. Фыцццаг рады ницӕй тыххӕй нæ хъæуы сонт тасы ныххауын, фӕлӕ хъæуы æххæст кæнын инструкцитæ, кæцытæ развæлгъау бацæттæ кæнынц УУМ специалисттӕ ахуыргæнджытимæ иумӕ", — балхынцъ кодта Гæбæраты Таймураз.
Ӕдӕппӕт уӕлвӕткон уавӕрты министрады кусджытӕ дӕс бонмӕ басгардзысты 53 скъолайы æмæ 23 сабидоны.
