ЦХИНВАЛ, 30 авг — Sputnik. Зонындзинӕдты бонӕн нывонд цытджын мадзӕлтты рӕстӕджы скъолаты территорийыл фӕфылдӕр кӕндзысты милицийы патрулы нымӕц, уагӕвӕрмӕ сӕ хъус дардзысты МХМ-ы 500 кусӕджы, фехъусын кодтой Sputnik уагдоны пресс-службӕйы.
Ацы аз ног ахуыры азы райдиан банысан кӕндзысты 54 республикон скъолайы. Сӕ къӕсӕртӕй фыццаг хатт бахиздзысты 620 ахуыргӕнинаджы.
"Ног ахуыры азы райдианы фӕдыл МХМ уадзы цытджын линейкӕты рӕстӕджы ӕхсӕнадон уагӕвӕрд ӕмӕ ӕдасдзинад бахъахъхъӕныны фӕдыл мадзӕлтты комплекс. Мадзӕлтты райсдзысты хайад мидхъуыддӕгты органты 500 кусӕджы", — загътой пресс-службӕйы.
МХМ-ы минӕвары ныхӕстӕм гӕсгӕ, ног ахуыры азы агъоммӕ Ӕхсӕнадон ӕдасдзинады милици бакодта стыр куыст ахуырадон уагдӕтты цӕттӕдзинад басгарыны фӕдыл. Ахуырадон уагдӕттӕ иууылдӕр ӕмӕ сӕ алыварс террторитӕ ӕрцӕудзысты сгӕрст сӕрмагонд техникон фӕрӕзты ӕмӕ службӕйон куыйты руаджы, уый фӕстӕ ист ӕрцӕудзысты фӕтыхджындӕргонд хъахъхъӕнынадмӕ.
"Цытджын мадзӕлттӕ ауадзыны рӕстӕджы скъолаты территорийыл фӕфылдӕр кӕндзысты милицийы патрулы нымӕц", — банысан кодтой МХМ-ы.
МХМ Паддзахадон автоинспекцийы управлени исы уӕлӕмхас мадзӕлттӕ фӕндагон змӕлды ӕдасдзинады фӕдыл, уӕлдайдӕр та скъолатӕм ӕввахс.
Автоинспектортӕ сгарынц фӕндагон хызӕджы уавӕр ахуырадон ӕмӕ скъолаагъоммӕ уагдӕтты цур, сгарынц скъолайон транспортон фӕрӕзтӕ.
"Сывӕллӕтты фӕндагон травматизмы цаутӕ ма ӕруадзыны нысанӕн ПАИУ уадзы профилактикон мадзӕлттӕ, кӕцытӕ здӕхт сты сывӕллӕтты уынгтыл ӕмӕ фӕндӕгтыл ӕдас уагахастыл фӕцайдагъ кӕнынмӕ", — бафтыдтой пресс-службӕйы.
ПАИУ ноджыдӕр шофырты зӕрдыл лӕууын кӕны, цӕмӕй ахуырадон уагдӕтты цур ӕххӕст кӕной фӕндагон змӕлды уагӕвӕрд.