ЦХИНВАЛ, 1 сен — Sputnik, Козаты Дианӕ. Козаты Асланбегмӕ ӕнхъӕлмӕ кӕсы серьезон тох дунейы чемпионы титулы тыххӕй, боксер йӕхӕдӕг, йӕ тренертӕ ӕмӕ хиуӕттӕ ӕнхъӕлмӕ кӕсынц йӕ уӕлахизмӕ, загъта Sputnik Асланы тренер, спорты сгуыхт дӕсны Сланты Виталий.
Ирон боксер-профессионал Козаты Асланбег "Lion" 23 сентябры стох кӕндзӕн хуссарафрикӕйаг спортсмен Паул Камангаимӕ IBO International (Ӕхсӕнадӕмон боксерон организаци) версимӕ гӕсгӕ дунейы чемпионы титулы тыххӕй.
"Тынг серьезон ныхмӕлӕуд у, Асланӕн ис аккаг ныхмӕлӕууӕг. Уый у серьезон фӕлварӕн нӕ спортсменӕн, уыимӕ иумӕ та у дунейон боксы элитӕмӕ баздӕхыны фадат", — загъта тренер.
Хуссар Ирыстонӕй ацӕугӕ Козаты Асланбег профессионалон рингмӕ рахызт 2008 азы. У WBC версийы Европӕйы чемпион, фӕсивӕды ӕхсӕн дунейы ӕхсӕнконтиненталон чемпионы титулы хицау, Азийы чемпион.
