ЦХИНВАЛ, 1 сен — Sputnik. Олимпиаг чемпион Рӕмонаты Сосланӕн балӕвар кодтой машинӕ ӕмӕ фатер Дзӕуджыхъӕуы, фехъусын кодтой РИА Новостий РЦИ-Аланийы хицауады.
"Егъау спортивон ӕнтыстыты тыххӕй республикӕйы къухдариуӕггӕнӕг бабуц кодта олимпиӕгты майдантӕй "Ирыстоны кадӕн". Уымӕй дарддӕр ма Рӕмонаты Сосланӕн балӕвар кодтой ӕртӕхатӕнон фатерӕй дӕгъӕлтӕ, дыууӕ милуан сомӕн сертификат ӕмӕ машинӕ Toyota Camry", — дзырдӕуы хъусинаджы.
Банысан ӕрцыд, лӕвӕрттӕ кӕй бакодтой Цӕгат Ирыстоны амалиуӕггӕнджыты ӕххуысӕй.
Уымӕй дарддӕр ма Цӕгат Ирыстоны хицӕуттӕ бабуц кодтой Риойы олимпиадӕйы æвзист призер Гозымты Хетæджы. Уымӕн дӕр радтой майдан "Ирыстоны кадӕн", дыууӕхатӕнон фатерӕй дӕгъӕлтӕ ӕмӕ ӕрдӕгмилуан сомӕн сертификат.
"Фатертӕ рахицӕн ӕрцыдысты амалиуӕггӕнджыты ӕххуысӕй, машинӕ та — меценатӕй", — дзырдӕуы хъусинаджы.
Ӕртыццӕджы, Беслӕны аэропорты спортсментыл сӕмбӕлдысты ӕртӕ уӕлибых ӕмӕ ирон бӕгӕныйы нуазӕнимӕ. Мадзалы ма уыдысты националон кӕфтытӕ.
Республикӕйы столицӕйы уынгтыл Олимпиадӕйы уӕлахиздзауты кортежыл цингӕнгӕйӕ ӕмбӕлдысты сӕдӕгай автомобилисттӕ.
