ЦХИНВАЛ, 7 сен — Sputnik. Хуссар Ирыстоны мидхъуыддӕгты министрады ӕвзонг кусджытӕ ӕнтыстджынӕй кӕронмӕ ахӕццӕ кодтой цыппармӕйон ахуыртӕ Профессионалон цӕттӕдзинады центры, фехъусын кодтой уагдоны пресс-службӕйы.
Профессионалон цӕттӕдзинады центры рацӕуынц райдиан ахуыр ног кусджытӕ. Ам ма сӕ квалификаци фӕбӕрзонддӕр кӕнынц Мидхъуыддӕгты хайады рӕнхъон, кӕстӕр ӕмӕ астӕуккаг сконд.
Мидхъуыддӕгты органты кусджытӕ ПЦЦ-ы ахуыр кӕнынц барадон зонындзинӕдты бындуртӕ, МХМ-ы кусджыты профессионалон культурӕ ӕмӕ этикӕ, криминалистикӕйы бындуртӕ, психологи, баххӕст кӕндзысты сӕ зонындзинӕдтӕ зынгон ӕмӕ физикон цӕттӕдзинадӕй, ӕдӕппӕтӕй 14 дисциплинӕ.
"Ӕдӕппӕт кусӕгон архайды ӕндӕр ӕмӕ ӕндӕр здӕхтыты фӕдыл Центры рацыдысты ахуыр кӕстӕр сконды 18 курсанты. Уыдон ныридӕгӕн радтой фӕлварӕнтӕ ӕмӕ райстой ӕвдисӕндартӕ курс ӕнтыстджынӕй рацӕуыны фӕдыл", — загътой пресс-службӕйы.
Центры сӕргълӕууӕджы хӕдивӕг Ӕлборты Хасан банысан кодта, ПЦЦ-ы кӕй кусынц профессионалон ӕмӕ фӕлтӕрд ахуыргӕнджытӕ — центры кусджытӕ ӕмӕ МХМ-ы службӕты сӕргълӕуджытӕ, кӕцытӕн ис практикон куысты фӕлтӕрддзинад — уыдон фӕрцы курсанттӕ райсынц ӕнӕмӕнгхъӕуӕг зонындзинӕдты ӕппӕт комплекс.
Уый бафиппайдта, центр нырма кӕй нӕ дзуапп кӕны ахуырадон процессы ӕппӕт домӕнтӕн, курсантты практикон ахуыртӕн нӕй ӕмбӕлон объекттӕ.
"ПЦЦ-ы къухдариуӕгад абон кусы ууыл, цӕмӕй ахуыртӕ уадзыны рӕстӕджы спайдагонд цӕуой ног методтӕ. Ныртӕккӕ хӕрзифтонг цӕуы ахуыры кълас проекторты руаджы ахуыртӕн. Ахуыры цӕстуынгӕ фӕрӕзтӕн ис ахсджиаг нысаниуӕг ӕмӕ сын ис бирӕ ӕвӕрццаг миниуджытӕ", — загъта Ӕлборты Хасан.
МХМ-ы Профессионалон цӕттӕдзинады центр сырӕзт 1999 азы декабры. Уӕд йӕ сӕргъ лӕууыд Кобылты Сергей. Йӕ сырӕзтӕй фӕстӕмӕ центры рацыдысты ахуыр уагдоны кусджытӕй 800-йӕ фылдӕр.
Курсантты радон къорд ӕрӕвналдзӕн ахуыртӕм ӕввахс къуырисӕры.
