ЦХИНВАЛ, 7 сен — Sputnik, Козаты Диана. Рӕмонаты Сосланы, Тедеты Дзамболаты ӕмӕ Мӕргъиты Анатолийы схорзӕхджын кодтой орден Уацамонгӕйӕ. Уӕлдӕр ӕфсӕддон хорзӕхтӕ сын радта Хуссар Ирыстоны президент Тыбылты Леонид.
Рӕмонаты Сосланӕн, уӕгъдибар хъӕбысӕйхӕцӕг ӕмӕ олимпиаг чемпионӕн ӕртыццӕджы цыт кӕнынц Цхинвалы. Спортсмены йӕхимӕ райста президент, стӕй уый сӕвӕрдта дидинтӕ горӕты 5-ӕм скъолайы кӕрты мемориалон уӕлмӕрды, бацыд ХИПУмӕ. Ныртӕккӕ Алина Кабаевайы номыл спорты галуан "Олимпы" уагъд цӕуынц цытджын мадзӕлттӕ спортивон архайджыты хайадистӕй.
Уацамонгӕ у Хуссар Ирыстоны иууыл бӕрзонддӕр хорзӕх. Уый лӕвӕрд цӕуы "хӕстон рӕстӕджыты хъӕбатырдзинад равдисыны ӕмӕ сгуыхтдзинӕдтӕ саразыны тыххӕй, афтӕ ма хӕсты фӕстиуджытӕ аиуварс кӕныны хъуыддагмӕ стыр хайбавӕрд бахӕссыны тыххӕй".
