ЦХИНВАЛ, 16 сен — Sputnik, Козаты Дианӕ. Ирон бӕгӕныйы фестиваль уагъд ӕрцыд цыппӕрӕмы Хуссар Ирыстоны Цхинвалы районы, уый уыд ӕхсӕнадӕмон фестиваль "Ирон Бӕгӕны 2016"-ы ӕрдӕгфиналы этаптӕй иу.
Ирон бӕгӕныйы конкурс уагъд цӕуы ныр цалдӕр азы дӕргъы, иууыл хуыздӕры номыл ӕрвылаз тох кӕнынц бӕгӕныхсидджытӕ Ирыстон ӕмӕ Кӕсӕг-Балхъарӕй.
Традицимӕ гӕсгӕ, жюрийы уӕнгтӕ фыццаг равзардзысты уӕлахиздзауты республикӕйы районты. Финалы та, кӕцы уагъд ӕрцӕудзӕн Дзӕуджыхъӕуы, айхъуысдзӕн иууыл хуыздӕр бӕгӕныхсидӕджы ном. Хайад ма дзы райсдзысты Францы цӕрӕг ирӕттӕ дӕр.
Хуссар Ирыстоны цыппар район дӕр бӕрӕгбоны уазджыты размӕ рахастой сӕ дзадджындӕр продукци — ирон уӕлибыхтӕ, дзидза, физонӕг, хӕдзарон цыхт, дзыкка, сӕн, хӕдзарон дыргътӕ ӕмӕ халсӕрттӕ. Бирӕ хӕринӕгтӕ арӕзт цыдысты фестивалы фӕзуатыл, уый тыххӕй ардӕм ӕрбаластой суджы пецтӕ. 15 хайадисджытӕй алкӕйдӕр фӕндыд йӕ фынгмӕ куыд фылдӕр уазджытӕ ӕрбахонын ӕмӕ сын йӕ продукцийӕ ацаходын.
"Уый у хъӕлдзӕг бӕрӕгбон, кӕцы нӕ ‘мбырд кӕны ныр цалдӕр азы фӕд-фӕдыл. Фарон дзы хайад дӕр райстон. Алцыдӕр ӕрцӕттӕ кодтон мӕхӕдӕг мӕ сыхӕгты ӕххуысӕй. Уӕлахиздзауты нымӕцмӕ нӕ бахаудтӕн, фӕлӕ уый сӕйраг нӕ уыд. Ӕз уыдтон, куыд райгонд уыдысты адӕм, кӕцытӕ ӕрбацыдысты бӕрӕгбонмӕ мӕ районы", — радзырдта Sputnik Ленингоры поселочы цӕрӕг Уалыты Зоя.
Фестивальмӕ ӕрцыдысты ӕрмӕст республикӕйы районты цӕрджытӕ нӕ, фӕлӕ ма уазджытӕ Воронежы областӕй. Уыдон баззадысты тынг райгондӕй ӕмӕ хъӕлдзӕг рӕстӕг ӕрвыстой бӕрӕгбоны иннӕ хайадисджытӕ ӕмӕ уазджытимӕ.
"Тынг ӕхсызгон мын у Ирыстонимӕ хӕлардзинад, ам цӕры тынг фӕлмӕн, рӕдау адӕм. Ацы бӕрӕгбон та у диссаджы цау. Алцыдӕр дзы у тынг хӕрзад, алы хӕринаг дӕр арӕзт у зӕрдӕбынӕй", — загъта Воронежаг областы вице-премьер Елена Фадеева.
Президенты номӕй фестивалы уазджытӕ ӕмӕ хайадисджытӕн раарфӕ кодта республикӕйы хицауады сӕрдары хӕдивӕг Тъехты Алан.
"Мах хъуамӕ дарддӕр кӕнӕм нӕ фыдӕлты традицитӕ. Ӕртӕ уӕлибых ӕмӕ ирон бӕгӕныимӕ мах скувӕм Хуыцаумӕ. Ӕмӕ абоны бӕрӕгбон дӕр у традицитӕ бахъхъӕныны фӕдыл мадзӕлттӕй иу", — загъты уый.
Цхинвалы районы ирон бӕгӕныйы фестиваль уагъд ӕрцыд фыццаг хатт. Районы сӕргълӕууӕг Плиты Алан зӕрдӕбын арфӕ ракодта бӕрӕгбоны фӕдыл ӕмӕ равдыста ныфс, ацы аз уӕлахиз кӕй бафтдзӕн фысымты къухы.
"Ацы бӕрӕгбон нӕ районы уагъд цӕуы фыццаг хатт. Алы район дӕр ӕрцӕттӕ кодта иууыл хуыздӕд продукци. Мах районӕй фестивалы исынц хайад цыппар адӕймаджы ӕмӕ мӕ ис ныфс, уӕлахиз кӕй бафтдзӕн нӕ къухты. Стыр ӕххуыс нын бакодтой компани "Бавария", Хуссар ӕмӕ Цӕгат Иры культурӕйы министрӕдтӕ", — загъта уый.
Цхинвалы районы культурӕйы хайад бацӕттӕ кодта концерт, цы ран сӕ дӕсниад равдыстой кафты коллективтӕ. Организатортӕ ма бӕцӕттӕ кодтой алыгъуызон спортивон конкурстӕ дӕр, цы ран ӕмхуызон ӕхсызгонӕй хайад истой куыд сывӕллӕттӕ, афтӕ хистӕртӕ дӕр. Цалынмӕ ӕрӕмбырдуӕвджытӕ хиирхӕфсӕн мадзӕлттӕм кастысты, уӕдмӕ дегустатортӕ та ӕвзӕрстой хуыздӕр бӕгӕны. Ацы бӕрнон куыст фестивалы организатортӕ баууӕндыдысты бӕгӕныфыцӕн компани "Бавария"-йы технологтӕн ӕмӕ дыууӕ бӕгӕнызонӕгӕн Хуссар Ирыстонӕй, кӕцыты ӕхсӕн уыд зынгӕ историк ӕмӕ ӕхсӕнадон архайӕг Челехсаты Хъазбег.
Бӕгӕныйы мигӕнӕнтӕ нысан уыдысты сӕрмагонд номыртӕй, цӕмӕй йӕ мачи зона, чи йӕ бахсыста. Алы хуызӕгӕн дӕр цыд аргъ иу баллӕй фондз баллы онг. Аргъ кодтой ӕрмӕст адӕн нӕ, фӕлӕ ма бӕгӕныйы хуыз ӕмӕ будтӕфӕн дӕр. Фӕстӕдӕр конкурсы жюрийы уӕнгтӕ ӕмӕ хайадисджытӕ схызтысты сценӕмӕ, цӕмӕй раргом кӕной уӕлахиздзауты нӕмттӕ. Алы бӕгӕныхсидӕгӕн дӕр лӕвӕрд ӕрцыдысты дипломтӕ ӕмӕ лӕвӕрттӕ компани "Бавария"-йӕ, фыццаг бынат ӕмӕ 15 мин сомӕн сертификат та лӕвӕрд ӕрцыд фестивалы иууыл ӕрыгондӕр хайадисӕг Мӕлдзыгаты Фатимӕйӕн Цхинвалы районы Тъбеты хъӕуӕй. Уый бӕгӕны бахсыста йӕ мады рецептмӕ гӕсгӕ.
"Бӕгӕны ‘хсидыны хъуыддаджы уӕлдай сусӕгдзинад ницы ис, сӕйраджыдӕр сты хуымӕллӕг ӕмӕ зад. Бӕгӕны бахсыстон мӕ мады рецептмӕ гӕсгӕ, кӕцы мын ӕххуыс дӕр бакодта йӕ цӕттӕ кӕныны рӕстӕджы. Ӕз никуы истон хайад ахӕм конкурсты ӕмӕ ӕнхъӕл нӕ уыдтӕн рамбулын. Тынг ӕхсызгон мын у", — загъта ӕрыгон бӕгӕныхсидӕг.
Районы сӕргълӕууӕг Плиты Аланы ныхӕстӕм гӕсгӕ, йӕ зӕрдӕмӕ тынг фӕцыд Знауыры районы цӕрӕджы бахсыстгонд бӕгӕны, фӕлӕ дегустатортӕ ацы хъуыдыйыл не сразы сты ӕмӕ ацы районӕй хайадисджытӕн радта дыккаг ӕмӕ ӕртыккаг бынӕттӕ.
"Алы районы бӕгӕныхсидӕджы продукцийӕ дӕр ацаходыдтон ӕмӕ иууылдӕр мӕ зӕрдӕмӕ фӕцыдысты. Мӕ хъуыдымӕ гӕсгӕ, Знауыры районӕн уыд адджындӕр ӕмӕ гъӕдджындӕр бӕгӕны, фӕлӕ жюри банымадта, Цхинвалы районы хайадисӕгӕн кӕй уыд иууыл хӕрзаддӕр бӕгӕны. Мӕнӕн уый тынг ӕхсызгон у ӕмӕ, мӕ хъуыдымӕ гӕсгӕ, иннӕ аз мах бацӕттӕ кӕндзыстӕм ноджы хӕрзгъӕддӕр бӕгӕны", — загъта уый.
Цӕгат Ирыстоны адӕмон культурӕ ӕмӕ этнотуризмы центр "Фарн"-ы директор Цӕриаты Валерий загъта Sputnik, ацы аз бӕрӕгбоны арӕнтӕ бӕрӕг кӕй фӕуӕрӕхдӕр сты — хайад дзы райсдзысты Францы цӕрӕг ирӕттӕ дӕр.
"Мах сорганизаци кодтам диссаджы бӕрӕгбон, кӕцы ӕрбангом кодта ӕнӕхъӕн адӕмыхӕттыты. Мӕ хъуыдымӕ гӕсгӕ, Хуссар ӕмӕ Цӕгат Иры ӕхсӕн ницы хицӕндзинад ис. Ӕмӕ рӕзгӕ фӕлтӕртӕн нӕ традицитӕ кӕй хъахъхъӕнӕм, уый у тынг ахсджиаг. Мах уыдыстӕм Самарӕйы областы ӕмӕ алчидӕр цымыдис кодта — цы бӕргбон у, цы бӕгӕны у. Ӕмӕ нын тынг ӕхсызгон у, кӕй сын раттам фадат Ирыстоны тыххӕй фылдӕр зонӕнтӕ райсын", — банысан кодта "Фарн"-ы директор.
Ирон бӕгӕныйы фестивалы организатортӕ сты Цӕгат Ирыстоны культурӕ ӕмӕ дзыллон коммуникациты министрад, Цӕгат Ирыстоны традицион культурӕ ӕмӕ этнотуризмы центр "Фарн". Конкурсы генералон спонсор у бӕгӕныфыцӕн компани "Бавария".
