ЦХИНВАЛ, 29 сен — Sputnik. Хетæгкаты Къостайы номыл паддзахадон премийы къамис сфидар кодта куыстыты номхыгъд, кæцытæ ацы аз тох кæндзысты бæрзонд хæрзæх райсыныл. Номыхыгъдмæ бацыдысты куыстытæ ирон филологи, литературæ, историон зонæды, публицистикæ æмæ аивады фадыджы.
Хетæгкаты Къостайы номыл паддзахадон преми фидар æрцыд президенты барамындмæ гæсгæ 2009 азы, лæвæрд цæуы дыууæ азы иу хатт. Хицæн æзты йæ лауреаттæ ссисты фысджытæ — Хъазиты Мелитон, Хъодалаты Герсан, историктæ — Гаглойты Юрий, Гаглойты Роберт æмæ æндæртæ.
Ацы аз премимæ раразмæгонд æрцыд ХИПУ ахуыргæнæг Кокойты Теймуразы дыууæтомон чиныг "Русско-осетинский энциклопедический словарь по биологии и медицине. Неологизмы и система терминов".
Литературæйы фадыджы преми райсынмæ раразмæгонд æрцыдысты Плиты Гацыры дыууæ чиныджы "Ирон литературæйы истори" æмæ "Къостайы дуне", Чехойты Ольгайы æмдзæвгæты æмбырдгон "Дæуæн, Ирыстон" æмæ Хъазиты Мелитоны радзырдтæ æмæ новеллæтæ ирон æвзагыл "Чырыстийы фæдзæхст".
Историон зонæдты фадыджы та къамис равзæрста ЗИИ хистæр зонадон кусæг Бигъуылаты Иринайы чиныг "Коста Леванович Хетагуров: научная биография".
Премимæ раразмæгонд куыстыты хсæн аивады фадыджы та ис ПТРК "ИР" сфæлдыстадон къорды куыст — кононыв "Ирон Вандея", Харебаты Тимуры ирон зарджыты æмбырдгонд чиныг "Мæ Ирыстон", афтæ ма ацы фадыджы преми райсынмæ кандидаттæ сты нывгæнджытæ Козаты Ушанг æмæ Бежанты Вадимы куыстытæ.
Публицистикӕйы къабазы та преми райсынмæ кандидатты номхыгъды ис журнал "Русское слово в Южной Осетии".
