ЦХИНВАЛ, 6 окт — Sputnik. Президент Тыбылты Леонид бафыста указ Sputnik репортажы хъайтартӕй иуӕн — Хъорнисы астӕуккаг скъолайы математикӕ ӕмӕ физикӕйы ахуыргӕнӕг Плиты Хазбийӕн сгуыхт ахуыргӕнӕджы ном раттыны фӕдыл, фехъусын кодтой президенты администрацийы протоколон управленийы.
Ахуыргӕнӕджы бон Sputnik радзырдта Хазби Ильяйы фырты тыххӕй, кӕцы ахуырады къабазы фӕллой кӕны 45 азы. Бирӕ хорзӕхтӕй уӕлдай ныры онг алкӕмӕн дӕр уарзон ахуыргӕнӕгӕн нӕ уыд сгуыхт ахуыргӕнӕджы ном. Фӕлӕ цалынмӕ Sputnik репортаж цӕттӕ кодта, уӕдмӕ президенты ӕмбӕлон указыл уыд къухфыст.
"Плиты Хазбийӕн лӕвӕрд ӕрцыд сгуыхт ахуыргӕнӕджы ном педагогон архайды сгуыхтдзинӕдты, рӕзгӕ фӕлтӕры ахуыр ӕмӕ хъомыл кӕныны ӕмӕ бирӕ ӕзты ӕнтыстджын куысты тыххӕй", — загътой протоколон управленийы.
Майрӕмбоны Цхинвалы уагъд ӕрцӕудзӕн Ахуыргӕнӕджы боны цытӕн цытджын ӕмбырд, цы ран хорзӕхтӕ иууылдӕр ссардзысты сӕ хицӕутты.
