ЦХИНВАЛ, 7 окт — Sputnik, Плиты Фатимæ. Хуссар Ирыстоны адæмон инструментты ансамбль "Айзӕлд"-ы хӕрзаудӕн концерт, кӕцы арӕзт ӕрцыд аварийы бахауӕг Битеты æмæ Тедеты бинонтæн баххуыс кæныныны нысанӕн, æрæмбырд кодта 100 мин сомы, фехъусын кодта Sputnik ансамблы аивадон къухдариуæггæнæг Уалыты Нина.
"Концерт ауагътам киноконцертон зал "Чермены", æппæт 326 билеты дæр æрцыдысты уæй. Адæм иууылдæр æлхæдтой билеттæ, кæд се ʻппæт рæстæг не ʻссардтой концертмæ æрбацæуынæн, уæддæр. Иуæй —иу организацитæ та æрбарвыстой билетты аргъæй фылдæр фæрæзтæ, уымæ гæсгæ нӕм æрæмбырд 100 мин сомы бæрц", — загъта Уалыты Нина.
Концерты ансамбль "Айзӕлд"-æй дарддæр архайдтой оперон зарæггæнæг Амага Готти, РХИ адæмон артист Ӕлборты Инал, эстрадон зарæггæнджытæ Хаситы Сослан, Хæбæлаты Лали, Сланты Ацæмæз æмæ æндæртæ.
Концерт организацигонд æрцыд культурæйы министрад, горæты культурæ æмæ спорты управлени æмæ ПККЗ "Чермен" — ы æмархайдæй. Мадзал ауадзынæн информацион æххуыс бакодтой агентад Sputnik, радио Ир-FM æмæ ПТРК "Ир".
