ЦХИНВАЛ, 13 окт — Sputnik. Цæгат Ирыстоны бавнæлдтой документалон киноныв "Испайнаг дзӕнгӕрӕг" исынмæ. Фильм таурæгъ кæны æртæ зындгонд гоймаджы цардвæндагыл, кæцыты баиу кодта Испанийы мидæггагон хæст, се хсæн Советон Цӕдисы хъайтар, инӕлар-булкъон Мамсыраты Хадзы-Умар, хъусын кæны цæгатирыстойнаг культурæйы министрад.
Фильм сисыныл Цæгат Ирыстоны ныр æртыккаг бон кусы кинокомпани "MIRIAMMEDIA"-йы исæн къорд.
"39 минутон кинонывы режиссер Дарья Пономаренко фæнд кæны Ирыстоны фондз боны дæргъы сисын хъæу Ольгинскæйы уæвæг Мамсыраты Хадзы-Умары хæдзар-музей, РЦИ-А национ музейы фонды æрмæджытæ, кæцытæ дзурæг сты номдзыд инæлары цардыл, ныффысдзысты йæ хæстæджыты мысинæгтæ, афтæ ма Ирон театры актерты хайадистæй сисдзысты хъайтары биноты цард", — загътой министрады.
Киноныв ист цæуы мыхуыр æмæ массон коммуникациты федералон агентады финансон хæрдзтæй.
Мамсыраты Хадзы-Умар (1903 — 1968) хайад иста Испаны æмбæстагон хæсты, афтæ ма советон-финнаг æмæ Стыр Фыдыбæстæйон хæстыты. Лæвæрд ын æрцыд Советон Цæдисы хъайтары ном. Испаны Мамсырайы фырты зоныц "булкъон Ксанти"-йæ, йӕ цардвӕндаг ӕмӕ хъӕбатырдзинӕдты бындурыл фыст ӕрцыд Эрнест Хемингуэйы уацмыс "По ком звонит колокол"-ы сӕйраг хъайтары фӕлгонц.
