ЦХИНВАЛ, 25 окт — Sputnik. Уӕрӕсейы Генералон прокуратурӕ, Мидхъуыддӕгты министрад, Ӕдасдзинады федералон службӕ ӕмӕ Слестгӕнӕн комитеты минӕвӕрттӕ ӕрцыдысты Цхинвалмӕ дыууӕбонон визитимӕ. Уыцы ӕмгъуыдмӕ уыдон хъуамӕ базонгӕ уой сӕ хуссарирыстойнаг коллегӕтимӕ ӕмӕ семӕ сфидар кӕной кусӕгон контакттӕ. Уый тыххӕй Тыбылты Леонидимӕ фембӕлды рӕстӕджы радзырдта УФ Ӕдасдзинады советы секретары хӕдивӕг Рашид Нургалиев.
Уый банысан кодта, зӕгъгӕ, кӕд балцы ӕмгъуыд у цыбыр, уӕддӕр барадхъахъхъӕнӕг органты кусджытӕн бантысдзӕн сӕ фӕлтӕрддзинад адих кӕнын ӕмӕ семӕ кусӕгон контакттӕ сфидар кӕнын, цӕмӕй дарддӕр сӕвзӕргӕ фарстытӕ иууылдӕр скъуыддзаг кӕной онлайн-режимы.
"Ацы мадзал пайдаджын уыдзӕн дыууӕ фарсӕн дӕр. Мах арӕх райсӕм документтӕ, фӕлӕ хуыздӕр у, цӕмӕй иухатт базонгӕ уӕм ӕмӕ дарддӕр фарстытӕ иууылдӕр скъуыддзаг кӕнӕм телефонӕй. Коллегӕтӕ иууылдӕр куы ӕрныхас кӕной ӕмӕ куы ӕруынаффӕ кӕной кусӕгон фарстытыл, уӕд мах Леонид Харитоны фыртимӕ ауаддзыстӕм уӕрӕх ӕмбырд ӕмӕ ӕркӕсдзыстӕм, цас эффективонӕй бакуыстой нӕ коллегӕтӕ", — загъта Нургалиев.
Тыбылты Леонид дӕр банысан кодта ацы фембӕлдты пайдадзинад ӕмӕ бафтыдта, "ахӕм вазыгджын рӕстӕг мах иууылдӕр кӕй хъуамӕ уӕм къӕрцхъус ӕдасдзинады фарстытӕм".
Дыццӕджы Нургалиев хъуамӕ фена Синагур — Карзманы фӕндаг, кӕцы цӕуы арӕзт Инвестпрограммӕйы фӕлгӕтты. Уый раразмӕ кодта хъӕппӕрис, цӕмӕй Хуссар Ирыстоны Ӕдасдзинады советы секретарь Плиты Анатолий бакуса 2017 азӕн куысты нывӕзтыл.
"Аз кӕронмӕ фӕхӕццӕ кӕны. Хъӕуы фенын, цы сарӕзтам ӕмӕ нын цы нӕ бантыст саразын. Чизоны, бахъӕуа раздӕхын ӕнӕскъуыддзаг фарстытӕм ӕмӕ ног азмӕ куысты нывӕзт бацӕттӕ кӕнын", — загъта Нургалиев.
Фембӕлды истой хайад республикӕйы тыхон структурӕты ӕмӕ барадхъахъхъӕнӕг органты сӕргълӕуджытӕ. Уӕрӕсейаг коллегӕтимӕ сӕ уынаффӕтӕ адарддӕр сты ӕхгӕд дуӕртты фӕстӕ.
