ЦХИНВАЛ, 2 ноя — Sputnik. Дзӕуджыхъӕуы 7-30 ноябры уагъд ӕрцӕудзӕн нырыккон аивады Паддзахадон центры ӕмбырдгонды ӕмӕ ӕнӕкоммерцион фонд "Аланика"-йы уацмысты юбилейон равдыст, кӕцы равдисдзӕн, дунейы 22 бӕстӕйы нывгӕнджытӕ 10 азы дӕргъы симпозиум "Аланика"-йы фӕстиуджытӕм гӕсгӕ цы нывтӕ скодтой, уыдон.
Равдыст райдайдзӕн республикӕйы цалдӕр фӕзуатыл: горӕт Беслӕны культурӕйы хӕдзары ӕвдыст ӕрцӕудзысты 2004 азы трагикон цаутӕн нывонд куыстытӕ; горӕт Дзӕуджыхъӕуы музейон экспозицимӕ баххӕст уыдзысты горӕттаг локалон контекстимӕ куыстытӕ. Ноджы ма дыууӕ уӕрӕх экспозици айтынг уыдзысты РЦИ-Аланийы Националон зонадон библиотекӕйы равдыстон залты ӕмӕ республикӕ Цӕгат Ирыстон — Аланийы Нывгӕнджыты Цӕдисы равдыстон залы.
9-13 ноябры уагъд ӕрцӕудзӕн конференци "Аланика. Юбилей куыд шанс", цы ран аивады уӕрӕсейаг ӕмӕ фӕсарӕйнаг раззагондӕр теоретиктӕ, куратортӕ, нывгӕнджытӕ ӕмӕ культурӕйы дӕснытӕ ӕруынаффӕ кӕндзысты Цӕгат Кавказы нырыккон аивады райрӕзтмӕ здӕхт хъӕппӕристӕ ӕмӕ стратегитыл, регионы традицион культурӕ ӕмӕ актуалон аивады коллизиимӕ баст проблемӕтыл, сбӕлвырд кӕндзысты "ног цауы" нысӕнттӕ ӕмӕ хӕслӕвӕрдтыл.
Аивадон симпозиум "Аланика"-йы нысан у цӕгаткавказаг регионы визуализацийы ӕнӕмӕнгхъӕуӕгдзинад глобалон аивадон картӕйыл йӕ хъысмӕт ӕмӕ спецификӕимӕ. Дӕсӕм юбилейон аз — фӕстиуджытӕ аразыны рӕстӕг ӕмӕ фидӕнмӕ стратегион нысанӕвӕрдтыл, ног форматтыл ӕмӕ ацы цауы нысаниуӕгыл ныхасы аххосӕг.
2007 азӕй фӕстӕмӕ Республикӕ Цӕгат Ирыстон — Аланийы столицӕ Дзӕуджыхъӕуы уагъд цӕуы цырын полилог нырыккон аивадыл, симпозиум "Аланика", кӕцы дӕс азмӕ локалон симпозиум-пленэрӕй фӕуӕрӕхдӕр ӕхсӕнадӕмон масштабы форумы онг.
