ЦХИНВАЛ, 4 ноя — Sputnik. Хуссар Ирыстонмӕ гастролты ӕрцӕудзӕн цирк "Миллениум" Нижний Новгородӕй, ӕртæ боны дæргъы Цхинвалы артисттӕн сӕ сырдтимӕ уыдзӕн фараст равдысты, фехъусын кодта Sputnik труппӕйы администратор Дмитрий Холод.
Нырмæ-иу Цхинвалмæ цы цирктæ æрцыд, уыдон архайдтой æнæ сырдтæй. Труппӕйы сконды иу уыдысты ӕрмӕстдӕр клоунтӕ ӕмӕ акробаттӕ. Ацы хабар уыдон æмбарын кодтой, зӕгъгӕ, Уӕрӕсейы паддзахадон арæны сæртыл сырдты рахизын кæныны хъуыддаджы фæзыны цæлхдуртæ.
Ныр "Миллениум"-ы администратор ныфс бавӕрдта, сæ равдыстыты клоунтæй дарддæр кӕй ахайдзысты алхуызон сырдтæ — маймули, енот, далматинец æмæ паддзахон пудель, афтӕ ма питон æмæ тути.
"Клоунтӕ æмæ сырдтимæ хъæлдзæг программæтæ цæудзысты сахат æмæ 20 минуты бæрц. Ралӕуды рæстæджы ма гæнæн уыдзæн рамбулын призтæ дæр, се ʻхсæн смартфон, тути æмæ алыгъуызон адджинæгтæ", — радзырдта Холод.
Фондз азы онг сабитæн циркмӕ бацæуæн уыдзӕн æнæ аргъæй, аннӕтӕн та билеты аргъ лæууы 300-400 сомы.
"Бирӕ билеттæ чи райса, уыдонæн слæудзæн иу бынат 300 сомы, науæд та йæ аргъ у чысыл фылдæр — 350-400 сомы", — бафтыдта йæ ныхæстæм уый.
Цирк "Миллениум"-ы гастролтæ Цхинвалы уагъд цӕудзысты 13-15 ноябры. Артисттæ дæтдзысты æрвылбон дæр фæйнæ æртæ равдысты 12:00, 14:00, 16:00 сахаттыл.
