ЦХИНВАЛ, 8 ноя — Sputnik. Никарагуайы ныры сӕргълӕууӕг Даниэль Ортега ӕртыккаг хатт рамбылдта сæ бæстæйы президентон æвзæрстытæ, хъусын кæны Никарагуайы уæлдæр æвзæрстыты совет.
"Ӕвзæрстыты хайад райста цæрджыты 68%. Хъæлæсæппæрсты фæстиуджытæм гæсгæ, Даниэль Ортегайæн схъæлæс кодта æвзарджыты 72,5%. Йæ иууыл æнтыстджындæр ныхмæлæууæг либералон-конституцион партийы минæвар Максимино Родригес райста æрмæстдæр 15%", — дзырдæуы хъусинаджы.
Бæстæйы æвзæрстытæ цыдысты 6 ноябры, сæ фæстиуджытæм гæсгæ æвзæрст æрцыд президент æмæ ранæуæг уыдзæн парламенты сконд.
Ног президентон æмгъуыд Даниэль Ортегайæн у цыппæрæм. Фыццаг хатт уый бæстæйы сæргъ слæууыд 1985 азы Сандинистон революцийы фæстиуæгæн. Ортега дыккаг хатт президентæй æвзæрст æрцыд 2007 азы, уæдæй фæстæмæ йæ къухдариугады бын Никарагуа сарæзта стыр къахдзæфтæ йæ размæцыды æмæ нымад цæуы Централон Америкæйы размæцыддæр бæстæтæй иуыл.
Никарагуа уыд дыккаг бæстæ Уæрæсейы фæстæ, кæцы банымадта Хуссар Ирыстоны хæдбардзинад — 3 сентябры 2008 азы. 2010 азы та Никарагуа æмæ Хуссар Ирыстоны хсæн фидар æрцыдысты дипломатон ахастытæ.
