ЦХИНВАЛ, 9 ноя — Sputnik, Плиты Фатимӕ. Зынгæ хуссарирыстойнаг нывгæнæг Гобозты Владимиры куыстыты равдыст ацæудзæн Мæскуыйы æхсæнадæмон дизайны центр "АРТ ПЛЕЙ"-йы, фехъусын кодта Sputnik нывгæнæг йæхæдæг.
Культурон мадзал уагъд цæудзæн 11-17 ноябры нырыккон аивады XXI æхсæнадæмон равдыст-конкурс "Российская Неделя Искусств"-ы фæлгæтты. Конкурс æрбамбырд кæндзæн арт-объекттæ дунейы 20 бæстæйæ æмæ УФ регионтæй, кæцыты æрбаиу кæндзæн ахæм темæ "Искусство в эпоху перемен".
"Равдысты уыдзæн авд куысты, уыдонæй ӕхсӕз хуызфыссынады æмæ иу куыст та æххæст у ӕнӕуафт гобелены техникæйы", — радзырдта нывгæнæг.
Оргкомитет сæрмагондæй рахицæн кодта Гобозты Владимиры куыстыты презентацийæн иу бон, йæ фæлгæтты ацæудзæн сфæлдыстадон фембæлд.
Равдыст арæзт цæуы Хуссар Ирыстоны культурæйы министрад æмæ Уæрæсейы уӕвӕг Хуссар Иры минæварады æххуысæй.
Гобозты Владимир куыд банысан кодта, афтӕмӕй ӕрбалæугæ азы фæнд кæны цхинвайлæгты дæр базонгæ кæнын йе 'сфæлдыстадимæ.
Гобозты Владимир цæры æмæ кусы Цхинвал æмæ Мæскуыйы. У æхсæнадæмон нывгæнджыты федерацийы, Ӕхсæнадæмон аивады фонды, Мæскуыйы нывгæнджыты цæдисы уӕнг æмæ Италийы нырыккон аивады равдысты лауретат.
Равдыстытæ йын уыд дунейы бирæ горæтты — "Художники России за чистую воду" Сочийы, Мӕскуыйы Нывгæнджыты централон хæдзары "Традиции современного искусства", испайнаг нывгæнджытимæ равдыст "2+1", горæт Коломнайы равдысты ӕмӕ ӕндӕрты.
