ЦХИНВАЛ, 10 ноя — Sputnik, Козаты Диана. Цхинвалы хицӕуттӕ ӕрӕвнӕлдтой горӕты уӕлмӕрдӕн ног бынаты хӕрзарӕзтадмӕ, загъта цыппӕрӕмы журналисттӕн Хуссар Ирыстоны столицӕйы мэр Ӕлборты Алан.
Ацы фарст иу ӕмӕ дыууӕ хатт нӕ систа горӕттаг дзыллӕйад. Уӕлмӕрды ныры территорийыл Згъудеры хъӕуы тынг рагӕй нал ис бынат. Зианджын бинонтӕ уаргӕ дӕр нал фӕкӕнынц сӕ хиуӕтты уӕлмӕрдтӕ.
"Уӕлмӕрды ног бынатыл уынаффӕ цыд Цхинвалы районы хицӕуттимӕ, санэпидстанц ӕмӕ ӕрдзон ресурстӕй пайдакӕнынады комитетимӕ иумӕ. Ӕппӕты фыццаг уыд дыууӕ варианты — фадгуытӕ Тъыбет ӕмӕ Къусреты хъӕуты. Горӕты хицӕуттӕ равзӕрстой фыццаг вариант. Ацы территори ис "Сыгъд удты музей"-ы фӕстӕ, горӕтмӕ ӕввахс ӕмӕ адӕмӕн ӕнцон уаид уырдӕм азы цыфӕнды афон дӕр ссӕуын", — загъта мэр.
Йӕ ныхӕстӕм гӕсгӕ, ацы бынатыл сразы сты сӕйраг санитарон дохтыр дӕр ӕмӕ ӕрдзон ресурсты комитет дӕр, фӕлӕ фӕстӕдӕр Цхинвалы районы разамынад нал сразы фадыг рахицӕн кӕныныл.
Уый фӕстӕ столицӕйы хицӕуттӕ аздӕхтой сӕ хъусдард Къусреты хъӕуы фадыгмӕ, кӕцы бынтон ӕнцонвадат нӕу ахӕм объектӕн, куыд уӕлмӕрд.
"Ацы фадыг ис къуылдымыл, чысыл бындӕр сты горӕты доны резервуартӕ. Фӕлӕ зӕронд уӕлмӕрды бынат кӕй нал ис, уый тыххӕй сразы стӕм ацы вариантыл. Сӕйраг санитарон дохтыр дӕр ӕмӕ ӕрдзон ресурсты комитет дӕр загътой, ацы бынат кӕй дзуапп дӕтты нӕ домӕнтӕн", — банысан кодта Ӕлборты Алан.
Горӕты разамынад ӕвӕры ныфс Цхинвалы районы хицауад оперативонӕй кӕй рахицӕн кӕндзӕн фадыг уӕлмӕрдӕн, уый фӕстӕ территорийы алыварс сӕмбонд кӕндзысты.
"Цӕмӕй афтӕ ма рауайа ӕмӕ нӕхӕдӕг къуылымпы кӕнӕм ацы уавӕр, уый тыххӕй мэрия сразы ацы иунӕг вариантыл", — загъта мэр.
Ног бынаты хӕрзарӕзтады фӕстӕ расидт ӕрцӕудзӕн тобӕ Згъудеры мӕрдты ныгӕнынӕн.
