ЦХИНВАЛ, 15 ноя — Sputnik. Дзæуджыхъæуы Гергиты Валерийы номыл аивæдты колледжы райдыдта "Ирыстоны æвзонгдзинад"-ы фестиваль, хъусын кæны ПТРК "Алания".
Фестивалы сæ арæхстдзинад æвдисынц республикæйы районты минæвæрттæ — 10 азæй 17 азы онг кæуыл цæуы, ахæм фæсивæд, æдæппæтæй 60 курдиатджын лæппу æмæ чызджы.
"Ацы аз фестивальмæ хаст æрцыд 5 номинацийы — скрипкæ, фортепиано, баян-аккардеон, вокал æмæ ирон фæндыр. Конкурсантты азтæм гæсгæ конкурс дихгонд у æртæ хайыл. Ахæм ерыстæ сараздзысты Октябрьскæйы хъæуы дæр", — дзырдæуы хъусинаджы.
Уæлахиздзаутæ Ирыстоны кад хъахъхъæндзысты Дельфиаг хъæзтыты апрелы, Екатеринбурджы. Цæгат Ирыстон алы аз дæр архайы ацы хъæзтыты.
Фестиваль арæзт æрцыд республикæйы культурæйы министрад æмæ фæсивæдон комитеты хъæппæрисæй.
