ЦХИНВАЛ, 15 ноя — Sputnik. НАТО ӕмӕ Гуырдзыстоны ӕфсӕддон ахуыртӕ хӕссынц тас регионы сабырад ӕмӕ стабилондзинадӕн, фехъусын кодтой Уӕрӕсейы фӕсарӕйнаг хъуыддӕгты министрады (ФХМ).
НАТО ӕмӕ Гуырдзыстоны аргъкӕнынад ӕмӕ тренировкӕты иумӕйаг Центры (JTEC) территорийыл Тбилисмӕ ӕввахс 10 ноябры райдыдтой ахуыртӕ "НАТО-Гуырдзыстон 2016". Уыдон адарддӕр уыдзысты 10 боны.
"Хъусдард здӕхт ӕрцыд радон иумӕйаг ӕфсӕддон маневртӕм, цы ран исынц хайад 250 ӕфсӕддон службӕгӕнӕгӕй фылдӕр 13 бӕстӕйӕ. Ацы аз уый у ӕртыккаг бирӕнационалон ахуыр ахӕм хуызы Гуырдзыстоны территорийыл — "Noble Partner" майы ӕмӕ "Agile Spirit" сентябры фӕстӕ. Гуырдзыстоны гарзджын тыхтӕ цӕуынц ахуыр НАТО-йы стандарттӕм гӕсгӕ альянсы командон-штабон структурӕты активон хайадистӕй", — банысан кодтой уый фӕдыл уӕрӕсейаг ӕддагполитикон уагдоны.
"Ахӕм активондзинады Уӕрӕсе уыны серьезон тас регионы стабилондзинад ӕмӕ сабырадӕн. Уый фӕдыл сӕ катайдзинад арӕх равдысынц Гуырдзыстоны иннӕ сыхӕгтӕ — Хуссар Ир ӕмӕ Абхаз дӕр. Махӕй алчидӕр хорз хъуыды кӕны, Бухарестаг саммитыл НАТО-йы уӕнгады ныфсытӕ кӕй ӕркодтой Тбилисы 2008 азы Цхинвалы сабыр цӕрджыты ӕмӕ уӕрӕсейаг фидауынгӕнджыты ныхмӕ фыдгӕнон ӕрбабырстмӕ", — дзырдӕуы дыццӕджы апарахатгонд УФ ФХМ-ы комментарийы.
Министрады банысан кодтой, НАТО-йы кӕй нӕ сусӕг кӕнынц, ныры ӕфсӕддон партнерадӕн Гуырдзыстонимӕ кӕй ис "Уӕрӕсейыл хӕцыны политикӕйы нысан".
