ЦХИНВАЛ, 16 ноя — Sputnik, Болататы Алина. Олимпиаг, Паралимпиаг ӕмӕ Сурдлимпиаг хъӕзтыты уӕлахиздзаутӕ ӕмӕ тренертӕ исдзысты ӕмхуызон ӕхцайы хӕрзиуджытӕ спортивон ӕнтыстыты тыххӕй. Уый тыххӕй хицауады ӕмбырдыл фехъусын кодта Цӕгат Ирыстоны физикон культурӕ ӕмӕ спорты министр Бӕройты Хасан.
Кӕд раздӕр, законмӕ гӕсгӕ, олимпиаг хъӕзтыты сыгъзӕрин майданы хицау иста иу милуан сомы, уӕд паралимпиӕгтӕ ӕмӕ сурдлимпиӕгтӕ та истой 500 мин сомы.
"Дзырд цӕуы ууыл, цӕмӕй спортсментӕн цы фиддӕнтӕ, премитӕ, стипендитӕ фыст цӕуынц, уыдон сӕмхуызӕн уой. Ома олимпиӕгтӕ, паралимпиӕгтӕ ӕмӕ сурдлимпиӕгтӕ исдзысты ӕмхуызон ӕхцайы хӕрзиуджытӕ спортивон ӕнтыстыты тыххӕй. Махмӕ дих нӕ цӕудзысты — олимпиаг ӕви паралимпиаг", — банысан кодта министр.
Цӕгат Ирыстоны хицауады уынаффӕ здӕхт у, цӕмӕй ацы хицӕндзинӕдтӕ ӕрцӕуой иуварсгонд. Ацы ӕмхуызоныл нымад фӕцагайдзӕн спортсментӕн ӕхцайы фиддӕнтӕй алкӕцыйы дӕр.
