ЦХИНВАЛ, 16 ноя — Sputnik, Болататы Алина. Цӕгат Ирыстоны министрты кабинет ӕртыццӕджы фехъусын кодта студентты нӕмттӕ, кӕцытӕ исдзысты республикӕйы сӕргълӕууӕг ӕмӕ РЦИ-Аланийы хицауады стипендитӕ.
Репсубликӕйы сӕргълӕууӕджы стипенди ахуыры ӕнтыстыты ӕмӕ сфӕлдыстадон архайды тыххӕй райстой ӕртӕйӕ: Чайковскийы номыл Мӕскуыйаг паддзахадон консерваторийы студент Бекъойты Илья, Санкт-Петербурджы паддзахадон консерваторийы студент Тедеты Хетӕг ӕмӕ Щепкины номыл уӕлдӕр театралон ахуыргӕнӕндоны студент Циукъаты Тотраз.
Республикӕйы сӕргълӕууӕджы стипенди лӕвӕрд цӕуы ӕрвылмӕй ӕмӕ у 15 мин сомы.
Афтӕ ма бӕлвырд ӕрцыдысты РЦИ-Аланийы хицауады сӕрмагонд паддзахадон стипендийы претенденттӕ. Хицауадон стипенди (8-10 мины бӕрц) лӕвӕрд цӕуы мӕй иу хатт.
Исдзысты йӕ ӕхсӕз студенты: кинематографийы Ӕппӕтуӕрӕсейаг паддзахадон университеты студент Гадзиты Валерий, Аивӕдты уӕрӕсейаг академийы цур Суриковы номыл Мӕскуыйаг паддзахадон академион институты студенткӕ Болотаты Фатимӕ, культурӕйы мӕскуыйаг паддзахадон институты студент Хуыгаты Батрадз, Гнесинты номыл Уӕрӕсейаг академийы студенткӕ Гурдзиты Анастасия, Вагановайы номыл Уырыссаг балеты академийы ахуыргӕнинаг Элана Авсарагова, афтӕ ма Руслан Гавиков — Пермаг паддзахадон хореографион колледжы студент.
