ЦХИНВАЛ, 5 дек — Sputnik. Советон цæдисы спорты мастер Сиукъаты Таймуразы номарæн турнир уæгъдибар хъæбысхæст æмæ самбойæ хуыцаубоны Дзауы районмӕ ӕрбамбырд кодта 150 спорстмены онг, фехъусын кодта Sputnik Дзауы районы хъæбысхæсты скъолайы директор Коцты Тамерлан.
Сиукъаты Таймуразæн нывонд турнир Хуссар Ирыстоны ацыд ныр дыккаг хатт фæд-фæдыл ӕмӕ дзы хайад райсынц курдиатджын спортсментӕ Хуссар ӕмӕ Цӕгат Ирыстонӕй.
"Ацы аз турниры архайдтой ӕрмӕст хуссарирыстойнаг спортсментӕ. Транскам ӕхгӕд кӕй у, уый аххосагæй цæгатирыстойнаг богалтæн æрцæуыны фадат нæ фæцис", — радзырдта Коцты Тамерлан.
Уый банысан кодта, турниры уæлахиздзаутæ ссисты Цхинвалы хъæбысхæсты скъолайы хъомылгæнинӕгтӕ æмæ Дзауы районы самбисттæ. Уæлахиздзаутæ æмæ призертæ хорзæхджын æрцыдысты кубоктæ, майдантæ æмæ грамотатæй.
Коцты Тамерлан ма равдыста ныфс, турнир кæй суыдзæн æрвылазон æмæ иу гауызмæ кӕ æмбырд кæндзæн курдиатджын спортсменты Ирыстоны ӕппӕт къуымтӕй.
Ерыстæ сорганизаци кодта Дзауы районы хъæбысхæсты скъола Хуссар Ирыстоны мидхъуыддæгты министрады сæрмагонд нысаниуæджы къорды æмархайдæй.
