ЦХИНВАЛ, 7 дек — Sputnik. Днестргæрон Молдаваг республикæйы 11 декабры равзардзысты бæстæйы ног сæргълæууæджы, æмбæстæгтæн фадат ис равзарын ӕхсӕз кандидатæй иу, хъусын кæны РИА Новости.
Ныридæгæн бæрæг у, сæйраг ныхмæлæуд кӕй уыдзæн парламенты спикер Вадим Красносельский æмæ ныры президент Евгений Шевчукы хсæн.
Социологты ӕрфарстыты бæрæггæнæнтæм гæсгæ, кæцы ауагътой августы кæрон, Евгений Шевчукæн схъæлæс кæнынмæ цæттæ сты æвзарджыты 14%, Вадим Красносельскийæн та — 24%.
"Ӕмгъуыдагъоммæ хъæлæсæппæрсты фыццаг боны хатдзæгтæм гæсгæ 6 декабры изæрмæ схъæлæс кодтой 287 æвзарæджы. 6-9 декабры хъæлæсæппæрст цæудзæн æмгъуыдагъоммæ территориалон æвзарæн къамисты, 10 декабры — фадыгонты. Сæйраг æвзæрстытæ ацæудзысты 11 декабры", — дзырдӕуы хъусинаджы.
Бӕстӕйы сӕргълӕууӕджы бынатыл тох кӕнынц ӕхсӕз кандидаты: ныры президент Евгений Шевчук, парламенты спикер Вадим Красносельский, Коммунистон партийы раздзог Олег Хоржан, Конституцион тæрхондоны раздæры сæрдар Владимир Григорьев, прокурор Александр Дели æмæ æгуыст Ирина Василакий.
Фæстаг президентон æвзæрстытæ ДМР уагъд ӕрцыдысты 2011 азы декабры. Уæд дыккаг туры хатдзæгтæм гæсгæ фæуæлахиз Евгений Шевчук.
