ЦХИНВАЛ, 8 дек — Sputnik. Хуссар Ирыстоны сӕргълӕууӕг Тыбылты Леонид хицауады рабадты рӕстӕджы банхъардта амалиуӕггӕнджыты кредиттӕ ныббарын, кӕцыты уыдон райстой Националон банкӕй 2008 азы 8 августы размӕ. Хицауады уӕнгтӕ ӕмхъӕлӕсӕй сразы сты президенты инициативӕимӕ, хъусын кӕны президент ӕмӕ хицауады пресс-службӕ.
Тыбылты Леониды ныхӕстӕм гӕсгӕ, хӕсты сфыст фӕахъаз уыдзӕн республикӕйы чысыл амалиуӕгады райрӕзтӕн.
"Хӕст бавзарӕг адӕм баййӕфтой материалон зиан дӕр, уымӕ гӕсгӕ саразын хъӕуы ӕппӕт дӕр, цӕмӕй уыдонӕй сисӕм кредитон уаргъ. Ныфс мӕ ис, раст мӕ кӕй бамбардзыстут", — банысан кодта президент.
Финансты министр Хӕбӕлаты Аза бафиппайдта, хӕсджынты номхыгъды кӕй ис 21 амалиуӕггӕнӕджы. Сӕ хӕсы иумӕйаг бӕрц у 3,5 милуан сомы.
Хицауады ацы скъуыддзаг нӕ бандавдзӕн ахӕм амалиуӕггӕнджытыл, кӕцытӕ кредиттӕ райстой 2008 азы фӕстӕ. Уыдон кредитон бӕрндзинады фӕдыл та кусы сӕрмагонд къамис.
