ЦХИНВАЛ, 12 дек — Sputnik. Днестргæрон молдаваг республикæйы (ДМР) президентон æвзæрстыты хайад райстой æвзарджыты 60% —мæ æввахс, фехъусын кодта брифингы Централон æвзарæн къамисы сæрдар Елена Городецкая.
Уымæй размæ ЦӔК фехъусын кодта, ДМР президентон æвзæрстытæ нымад кӕй æрцыдысты.
"Ӕвзæрстыты хайад райстой цæрджыты 59,16%… Махæн уыдон сты хорз бæрæггæнæнтæ. Иууыл активондæрæй йæхи равдыста Тирасполь", — загъта Городецкая.
Бӕстӕйы сӕргълӕууӕджы бынатыл тох кодтой ӕхсӕз кандидаты: ныры президент Евгений Шевчук, парламенты спикер Вадим Красносельский, Коммунистон партийы раздзог Олег Хоржан, Конституцион тæрхондоны раздæры сæрдар Владимир Григорьев, прокурор Александр Дели æмæ æгуыст Ирина Василакий.
Exit poll-ты бæрæггæнæнтæм гæсгæ, хъæлæсты 69,8%-мӕ фыццаг бынатыл цæуы ДМР парламенты спикер Вадим Красносельский, ныры президент та райста æрмæстдæр 18,8%. Аннæ кандидаттæ райстой цъус хъæлæстæ. Ӕппæт кандидатты ныхмæ та схъæлæс кодтой æвзарджыты 6,4%.
Фæстаг президентон æвзæрстытæ ДМР уагъд ӕрцыдысты 2011 азы декабры. Уæд дыккаг туры хатдзæгтæм гæсгæ фæуæлахиз Евгений Шевчук.
