ЦХИНВАЛ, 15 дек — Sputnik. Хуссар Ирыстоны 16 азы онг кары сывӕллӕтты ныййарджытӕ райсдзысты 6 мин сомы бӕрц иурӕстӕгон фиддӕнтӕ алкӕцы сывӕллонӕн дӕр. Уый тыххӕй Sputnik фехъусын кодта ӕнӕниздзинад хъахъхъӕнынады ӕмӕ социалон райрӕзты министр Григорий Кулиджанов.
Фиддӕнтӕ фыццаджыдӕр бандавдзысты ахӕм ӕмбӕстӕгтыл, кӕцытӕ уыдысты хаст социфтонгады органты номхыгъдмӕ 2016 азы 30 ноябры онг. Иннӕтӕ иурӕстӕгон фиддӕнтӕ райсдзысты ӕрмӕстдӕр 2017 азы.
"Сабиты ныййарджытӕ, кӕцытӕ ӕрцыдысты хаст социфтонгады органты номхыгъдмӕ 2016 азы 30 ноябры онг ӕмӕ нӕ исынц сывӕллӕтты пособитӕ Цӕгат Ирыстоны, райсдзысты 6 мин сомы бӕрц иурӕстӕгон фиддӕнтӕ алкӕцы сывӕллонӕн дӕр. Уыдон фыст ӕрцӕудзысты дыууӕ этапӕй — се ‘рдӕг сын ныййарджытӕ райсдзысты ацы мӕйы кӕрон, аннӕ ‘рдӕг та 2017 азы марты онг", — загъта Кулиджанов.
Министры ныхӕстӕм гӕсгӕ, ацы фиддӕнты тыххӕй уӕрӕсейаг бюджетӕй хицӕн ӕрцыд 39 милуан соммӕ ӕввахс.
Фиддӕнтӕ райсыны тыххӕй документтӕ 30 ноябры онг цы ныййарджытӕ нӕ бацӕттӕ кодтой, уыдон та иурӕстӕгон фиддӕнтӕ райсдзысты 2017 азы республикӕйӕн йӕхи фӕрӕзтӕй.
Кулиджанов ма куыд банысан кодта, афтӕмӕй сывӕллӕтты пособитӕ исыны тыххӕй документтӕ хъӕуы ранӕуӕг кӕнын алы азы райдианы дӕр.
