ЦХИНВАЛ, 28 дек — Sputnik. Цæгат Ирыстоны нывгæнджыты Цæдисы залы байгом равдыст «Афæдзы вернисаж», хъусын кӕны ПТРК "Алания".
Мадзал арæзт фӕцæуы алы азы кæрон дæр, фæлæ ацы хатт конд у конкурсы хуызы.
Алы æрбацæуæгæн æмæ нывгæнæгæн йæ бон у, йæ зæрдæмæ цы куыст æмæ автор фæцыдысты, ууыл схъæлæс кæнын. Уый тыххæй хъуамæ бæрæггæнæнтæ сæвæра сæрмагонд бюллетены.
"Нывкæнынад, скульптурæ, графикæ, æрмдæсныйад… Алы куыст дæр хицæн ныхасы аккаг. Конкурсы хатдзæгтæм гæсгæ хуыздæртæ хорзæхджын æрцæудзысты дипломтæй æмæ æхцайы премитæй", — дзырдӕуы хъусинаджы.
Равдысты ис 150 куысты бæрц, конд сты алы жанрты. Йæ байгом кыныны кадджын мадзалы архайдтой Цæгат Ирыстоны культурæйы министрад, нырыккон аивады центр, Æхсæнадон палатæ, Дзæуджыхъæуы епархи. Æрбацæуджытæ куыд загътой, афтæмæй Ирыстоны нывкæнынады скъолайӕ рацыдысты бирæ зындгонд нывгæнджытæ æмæ сæ фæлтæрддзинадыл ахуыр кæнынц иннæты.
Равдыст цæудзæн мæйы дӕргъы.
