ЦХИНВАЛ, 25 янв — Sputnik. Хуссар Ирыстоны Центрӕххӕсткоммӕ ӕртыццӕджы бахатыд инициативон къорд экс-президент Кокойты Эдуарды республикӕйы сӕргълӕууӕджы бынатмӕ кандидатӕй раразмӕ кӕныны фӕдыл, загътой Sputnik ЦӔК-ы.
Хуссар Ирыстоны президенты ӕвзӕрстытӕ нысан ӕрцыдысты 9 апрельмӕ. Ныридӕгӕн 25 январы ӕвзӕрстагъоммӕ съезд ауадзыны тыххӕй хъусынгӕнинагимӕ ЦӔК-мӕ бахатыдысты политикон парти "Иугонд Ирыстон"-ы минӕвӕрттӕ. Архайгӕ президент Тыбылты Леониды раразмӕ кӕныны фӕдыл инициативон къорд ӕмбырд ауаддзӕн 31 январы.
"ЦӔК-мӕ ӕртыццӕджы ӕрбахатыд Кокойты Эдуарды президентӕй кандидаты раразмӕ кӕныны фӕдыл инициативон къорд. Инициативон къорды ӕмбырд уагъд ӕрцӕудзӕн 1 февралы профцӕдисты бӕстыхайы", — загътой ЦӔК-ы.
Кокойты Эдуард ахста Хуссар Ирыстоны президенты бынат дыууӕ ӕмгъуыды фӕд-фӕдыл — 2001 азӕй 2011 азмӕ. Йӕ хицауиуӕгады кӕронбӕттӕн рӕстӕг баст уыд оппозициимӕ ныхмӕлӕудимӕ, кӕцы карзӕй домдта йӕ бынат ссӕрибар кӕнын.
