ЦХИНВАЛ, 19 янв — Sputnik. Хуссар Ирыстоны президенты бынатмӕ кандидат хъуамӕ дзуапп дӕтта "биноныгдзинады ценз" ӕмӕ архайгӕ закондӕттынады ӕндӕр домӕнтӕн, науӕд Центрӕххӕстком не ′сразы уыдзӕн йӕ срегистраци кӕныныл, загъта Sputnik ЦӔК-ы сӕргълӕууӕг Плиты Белла.
Ивгъуыд азы кӕрон Хуссар Ирыстоны экс-президент Кокойты Эдуард фехъусын кодта, кӕй фӕнд кӕны ӕртыккаг хатт райсын хайад Хуссар Ирыстоны президентон ӕвзӕрстыты. Архайгӕ президенты администрацийы кӕцыдӕр чиновниктӕ сарӕзтой комментаритӕ ацы хъусинагӕн, ома Кокойты Эдуардӕн нӕй ӕнӕмӕнгхъӕуӕг "биноныгдзинады ценз", уымӕ гӕсгӕ йӕ Центрӕххӕстком не ′срегистраци кӕндзӕн президенты бынатмӕ кандидатӕй.
"Ӕнӕдызӕрдыгӕй, йӕ архайды ЦӔК бындуриуӕг кӕндзӕн ӕрмӕстдӕр Хуссар Ирыстоны архайгӕ закондӕттынадыл, уый та у алкӕмӕн дӕр иу — Кокойты Эдуардӕн дӕр ӕмӕ президенты бынатмӕ ӕндӕр кандидаттӕн дӕр", — бахахх кодта Плиты Белла.
Уый ма бафтыдта, зӕгъгӕ, кӕд адӕймаг фӕстаг дӕс азы ӕппынӕдзух нӕ цард Хуссар Ирыстоны территорийыл ӕмӕ нӕ дзуапп кӕны "ценз"-ы ӕмӕ ӕндӕр домӕнтӕн, кӕцытӕ сты ӕвӕрд президенты бынатмӕ кандидатты раз, уӕд ЦӔК райсдзӕн уый фӕдыл ӕмбӕлон уынаффӕ ӕмӕ не ′сразы уыдзӕн уый срегистраци кӕныныл.
Хуссар Ирыстоны закондӕттынадмӕ гӕсгӕ, регистрацийы уысммӕ президенты бынатмӕ кандидатыл хъуамӕ 35 азӕй къаддӕр ма цӕуа, хъуамӕ дзура паддзахадон ӕвзӕгтыл ӕмӕ цӕра Хуссар Ирыстоны территорийыл фӕстаг дӕс азы.
