ЦХИНВАЛ, 6 фев — Sputnik. Хуссарирыстойнаг фӕсивӕдон ӕхсӕнадон центр "Ног фӕлтӕр" сорганизаци кодта республикон Фӕсивӕдон активы скъола, кӕцыйы хайадисджытӕ рацӕудзысты теаретикон ӕмӕ практикон лекциты курс Ирыстоны цӕгат ӕмӕ хуссары социалон—нысаниуӕгджын проекттӕ реализаци кӕныны фӕдыл.
Организатортӕ куыд фехъусын кодтой, афтӕмӕй ахуыртӕ цӕуынц центр "Барс"-ы базӕйы, Цӕгат Ирыстоны Фыййагдоны поселочы. Скъола ӕрбамбырд кодта 40 хайадисӕджы, уыдон ӕхсӕн сты ХИПУ-ы студенттӕ ӕмӕ активон фӕсивӕд.
Къуырийы дӕргъы фӕсивӕд сӕххӕст кӕндзысты вазыгджын, фӕлӕ цымыдисон хӕслӕвӕрдтӕ: проекттӕ фыссын, менталон картӕ аразын, публикӕйы раз ралӕуд цӕттӕ кӕнын ӕмӕ бирӕ ӕндӕртӕ.
"Ацы скъолайы хицӕндзинад ис уый мидӕг, ӕмӕ программӕ ӕнӕхъӕнӕй у индивидуалон ӕмӕ сӕрмагондӕй арӕзт ӕрцыд ацы проект реализаци кӕныны тыххӕй. Рацӕугӕ ӕрмӕг бафидар кӕныны тыххӕй та организатортӕ сарӕзтой практикон хай, цы ран райдайынц архайын байхъуыстгонд лекциты хӕдфӕстӕ", — банысан кодта "Ног фӕлтӕр"-ы минӕвар.
Ахуырты фӕстӕ организаторты ныфс ис райсын активистты командӕ социалон-нысаниуӕгджын проекттӕ ӕххӕст кӕныны, мадзӕлттӕ уадзыны ӕмӕ республикӕйы ӕхсӕнадон царды райрӕзты тыххӕй.
Ахуырты ахадындзинад фӕбӕрзонддӕр кӕныны нысанӕн организатортӕ ӕрбахуыдтой профессионалты къорд Нижний Новгородӕй.
