ЦХИНВАЛ, 21 дек — Sputnik. Цхинвалы Ногдзауты парчы ногазы бæрæгбонмæ фыццаг хатт æвæрд æрцæудзæн ихылбырæн фæз, фехъусын кодта Sputnik фæсивæдон инициативæты центр"Ног фæлтæр"-ы сæрдар Цхуырбаты Сергей.
Хуссар Ирыстоны нырмæ ихылбырæн фæз никуы ма уыд. Инициаторты фæндмæ гæсгæ, ихын галуан хъуамæ Цхинвалы æрбайгом уа Ног азы къæсæрыл- 30-31 декабры.
"Ихылбырæн фæзы ифтонгад нын æрдæгазмæ радтой горæт Дзæуджыхъæуы бынæттон хиуынаффæйады администраци ӕмӕ Цхинвалы хицæутты бадзырды фæлгæттты. Ихылбырæн фæзы æрбайгом кæнынмæ бацæттæ кæныныл архайынц фæсивæдон центры уæнгтæ æмæ Цхинвалы администрацийы кусджытæ. Нæ фæндмæ гæсгæ, 30 —31 декабры хъуамæ уа цæттæ ", — радзырдта Цхуырбаты Сергей.
Уый ма бамбарын кодта, ихылбырæн фæзмæ цæуыны фæтк дӕр.
"Ихын фæз у 700 кв.метры бæрц, кусдзæн хъарм боныгъæдты дæр суанг 10 градусы онг. Бынаты райсæн уыдзæн къахдзоныгътæ. Къахдзоныгътыл бырын чи уарзы, уыдонæн фадат уыдзæн суанг февральмæ сæхи ирхæфсын Цхинвалы ихын фæзыл", — бафтыдта йæ ныхæстæм уый.
Цхуырбаты Сергей ма банысан кодта, фæсивæдон организаци кӕй бахатдзæн хицауадмæ, цæмæй ихын фæз Дзæуджыхъæуæй балхæной æмæ баззайа Цхинвалы.
Ихылбырӕн фæз Цхинвалы саразыны хъæппæрис æххæст цæуы фæсивæдон центр "Ног фæлтæры"-ы фæндæй президент Тыбылты Леонид æмæ горæт Цхинвалы мэрияйы æмархайдæй.
