ЦХИНВАЛ, 8 фев — Sputnik. Хуссар Ирыстоны экс-президент Кокойты Эдуард дзуапп нӕ дӕтты биноныгдзинады цензы домӕнтӕн, дзырдӕуы Централон ӕвзарӕн къамисы комментарийы, кӕцы мыхуыр ис ЦӔК-ы официалон сайтыл.
Инициативон къорд Кокойты Эдуарды кандидатæй раразмæ кодта 1 февралы æмбырды.
"Кокойты Эдуард фæстаг фондз азы нæ цард Хуссар Ирыстоны, уымæ гæсгæ биноныгдзинады цензы домæнтæн дзуапп нæ дæтты æмæ йын нæй барадон бындур президенты бынатмæ кандидатæй регистрацийæн. Кокойты Эдуард йæ документтæ куы бадæтта ӕмӕ Хуссар Ирыстоны компетентон органтæ басгæрсты рӕстӕджы биноныгдзинады цензы цухдзинад куы рабæрæг кæной, уæд уый регистраци не ʻрцæудзæн", — дзырдæуы комментарийы.
Ӕвзæрстагъоммæ кампани Хуссар Иры райдыдта 17 январы. Абоны онг ЦӔК-мæ бацыдысты президенты бынатмæ аст кандидаты инициативон къордтæ, фæстæдæр кандидаттæй иу йæ къух систа президентон амбицитыл.
Инициативон къорды æмбырдтæ ауагътой архайгæ президент Тыбылты Леонид, депутат Къозонты Алан, Кокойты Эдуард, Гаглойты Алан æмæ Багаты Амираны фарсхæцджытæ. Уымæй дарддæр ма ацыд парти "Иугонд Ирыстон"-ы æвзæрстагъоммæ съезд, цы ран кандидатæй раразмæ кодтой Бибылты Анатолийы.
