ЦХИНВАЛ, 15 фев — Sputnik. Аланийы дзуарæфтыд райсыны 1100 азы юбилеймæ Дзæуджыхъæуы Алайнаг епархи расидт конкурс графикӕ æмæ хуызфыссынады фадыджы, хъусын кæны ПТРК "Алания".
Историон бæрæггæнæнтæм гæсгæ, чырыстон дины æндæвдад алантæ банкъартой I-IVæнусты, фæлæ официалонæй нымад цæуы, Алани чырыстон дин кæй райста иуӕндӕс æнусы размæ.
Мадзалы нысан у традицион хуызфыссынады фадыджы цы нывгӕнджытӕ архайы, уыдон сразӕнгард кӕнын, афтӕ ма алайнаг историйӕ ист цымыдисон цауты четӕныл равдисын.
«Дзæуджыхъæуы епрахи тырны, йæ тыхы цы ис, уымæй баххуыс кæнын конкурсы архайджытæн. Епархи æмархайд кæндзæн республикӕйы нывкæнынады размæцыдæн, куыд нæ культурæйы ахадгæ хайæн, афтæ", — хъусын кæны ПТРК епископ Дзæуджыхъæуккаг ӕмӕ Алайнаг Леониды ныхæстæ.
Сфæлдыстадон конкурс ацæудзæн æртæ номинацийы — Аланийы Чырыстон дин, республикæйы бынтыл конд ныв æмæ историон гоймаджы ныв. Конкурсы призон фонд у 300 мин сом. Организаторты ныфс ис, ацы мадзал фыццаг рады кæй æрбамбырд кæндзæн профессионалты.
Мадзал арæзт цæуы Дзæуджыхъæуы Алайнаг епархийы хъæппæрисæй Цæгат Ирыстоны нывгæнджыты цæдисы æмархайдæй.
