ЦХИНВАЛ, 21 фев — Sputnik. Фыдыбӕстӕ хъахъхъӕнджыты бонмӕ культурӕйы министрады хъӕппӕрисӕй Цхинвалы ацӕудзӕн ирон кинойы къуыри, фехъусын кодтой Sputnik уагдоны пресс-службӕйы.
Мӕйы кӕронмӕ ӕвдыст цӕудзысты ирон киноаивады хуыздӕр нывтӕй ӕхсӕз. Ацы къуырийы дӕргъы стыр экраныл фенӕн уыдзӕн кӕвдӕсард Чермены тох йӕ барты фӕдыл, хъайтар Дзарахохты Хаджи-Мураты цардвӕндаг, Джусойты Мураты кӕцыдӕр куыстытӕ ӕмӕ ӕндӕр фильмтӕ.
"Ирон кинонывты равдыст цӕудзӕн 21 февралӕй 28-мӕ ПККЗ "Чермен"-ы. Ӕдӕппӕтӕй равдисдзысты ӕхсӕз нывы ирон ӕмӕ уырыссаг ӕвзӕгтыл. Мадзал арӕзт ӕрцыд Фыдыбӕстӕ хъахъхъӕнджыты боны цытӕн. Уымӕй дарддӕр ма бӕрӕгбонмӕ 23 февралы ам ацӕудзӕн уӕрӕсейаг зарӕггӕнджыты рок-къорд "Земляне"-йы концерт", — загътой пресс-службӕйы.
Мадзалы фӕлгӕтты равдисдзысты ирон режиссер Джусойты Мураты дыууӕ кинонывы — историон фильм "Фарн" ӕмӕ киноныв "Хохаг".
"Волшебная папаха" ист ӕрцыд ивгъуыд ӕнусты 60 ӕзты ирон аргъӕутты бындурыл.
"Жизнь ставшая легендой 1,2" таурӕгъ кӕны мидӕггагон хӕсты хъайтар Дзарахохты Хаджи-Мураты цардвӕндагыл.
"По следам Карабаира"-йы ӕвдыст цӕуы 30 ӕзты уавӕр, Советон хицауад фидар кӕныны рӕстӕг ӕмӕ Кавказы цӕрӕг адӕмты ӕнусон традицитӕ.
"Чермен" ист ӕрцыд 1970 азы. Драмӕйы ӕвдыст цӕуы кӕвдӕсард Чермены хъысмӕт, цаутӕ цӕуынц Ирыстоны хъӕутӕй сӕ иуы.
