ЦХИНВАЛ, 22 фев — Sputnik, Плиты Фатимӕ. Хуссар Ирыстон æмæ Уæрæсейы æдасдзинад æмæ хъахъхъæнынады иумæйаг контур саразыны фæдыл дыууӕ бӕстӕйы ӕфсӕддон ведомствӕты хсæн ӕввахс рæстæджы бафыст æрцæудзæн уæлæмхас бадзырд, кæцыйы фæрцы ирон æфсæддонты куыстмыздтæ схиздзысты цæгаткавказаг æфсæддонты фиддӕнты ӕмвӕзадмӕ. Уый тыххæй фехъусын кодта президент Тыбылты Леонид Фыдыбæстæ хъахъхъæнæджы боны æмæ Хъахъхъæнынады министрады сæвзæрдыл 24 азы сæххæсты фæдыл цытджын ӕмбырды рæстæджы.
Бӕстӕйы сӕргълууӕг ӕфсæддонтæн раарфæ кодта сӕ бӕрӕгбоны цытӕн æмæ банысан кодта, Хъахъхъæнынады министрады кусджытæм æввахс рæстæджы кæй æнхъæлмæ кæсынц æвæрццаг ивындзинæдтæ.
"Ӕмцæдисад æмæ интеграцийы фæдыл бадзырды фæлгæтты хъахъхъæнынады хаххыл уæлæмхас бадзырд бафыссыны фæдыл ацы бонты æнхъæлмæ кæсæм фæхуындмæ. Документы фæлгæтты арæзт æрцæудзæн хъахъхъæнынады иумæйаг контур. Ӕфсæддонты куыстмызд фæфылдæр кæнын æмæ сӕ материалон-техникон ифтонгад фæхуыздæр кæныны пункттæ дæр æрцæудзысты æххæст", — загъта президент.
Уый ма банысан кодта, бæрæгбоны цытæн фæстæдæр къорд æфсæддонӕн лӕвӕрд кӕй æрцæудзысты паддзахадон хорзæхтæ.
Дарддӕр ӕрæмбырдуæвджытæ иу уысм æдзæмæй алæугæйæ ссардтой зынгхуыст хъайтарты æмæ Уӕрӕсейы ӕххӕстбарджын минӕвар Иугонд нациты организацийы Виталий Чуркины рухс нæмттæ.
Цытджын æмбырдмæ æрбацыдысты, Хъахъхъæнынады министрады бындурæвæрдмæ сæ хайбавæрд чи бахаста уыдон, æфсæддонтæ, хæсты ветерантæ, республикæйы къухдариуæгад, кадетон скъолайы ахуырдзаутæ, уазджытæ Абхазы республикæйæ.
