ЦХИНВАЛ, 9 апр — Sputnik. Хуссар Ирыстоны райдыдта хъæлæскæнынад президенты равзæрсты æмæ республикæйы ном Паддзахад Аланийимæ раивыны референдумы фæдыл, фехъусын кодтой Sputnik Централон æвзарæн къамисы.
Президентон æвзæрстытæ æмæ республикæйы ном раивыны фæдыл референдум уагъд цæуынц 77 æвзарæн фадыджы. Уыдонæй 72 æрбайгом Хуссар Ирыстоны территорийыл, æртæ — Цæгат Ирыстоны, фæйнæ иу та — Мæскуы æмæ Сухумы минæварадты.
Хъæлæскæнынад адарддæр уыдзæн 20:00 сахатмæ бынæттон рæстæгæй (кæцы мæскуыйагимæ у иугъуызон).
Хъæлæскæныны бар ис республикæйы æмбæстæгтæн, кæцытыл сæххæст 18 азы. ЦӔК-ы бæрæггæнæнтæм гæсгæ, æвзæрстыты фадат ис хайад райсын 32 736 æвзарæгæн.
Уæлахизæн кандидаты хъæуы æрæмбырд кæнын хъæлæсты 50%-æй фылдæр.
Хъæлæсгæнджыты æрбацыд хъуамæ уа 50% æмæ иу хъæлæс. Централон æвзарæн къамис ныммыхуыр кодта 40 200 æвзарæн бюллетены. Уыдонæй 6 550 сты нысангонд республикæйæн æддейæ фадгуытæн.
Хуссар Ирыстоны хъæлæскæнынадмæ сæ хъус дарынц 80 цæстдарæджы Уæрæсе, ДАР, ЛАР, Хæххон Карабах, Днестргæрон республикӕ ӕмӕ Цæгат Ирыстонæй.
Ӕвзæрстыты развæлгъау хатдзæгтæ фехъусын кæндзысты абон æмбисæхсæвмæ æввахс, æлхынцъонтæ та — хъæлæскæнынады бонæй фæстæмæ фондз боны мидæг.
Хуссар Ирыстоны тыхон структурæтæ службæ хæссынц фæтыхжындæргонд режимы, хъææлæскæнынады фæтк хъахъхъæны МХМ-ы хисæрмагонд сконд. Республикæйы ПӔК-ы информацимæ гæсгæ, президентон æвзæрстыты тыххæй Гуырдзыстонимæ арæн æхгæд уыдзæн 10 апрелы онг.
