ЦХИНВАЛ, 9 апр — Sputnik, Козаты Диана. Уӕрӕсейы Центрӕвзӕрсткъамы минӕвӕрттӕ, кӕцытӕ сӕ хъус дарынц Хуссар Ирыстоны президентон ӕвзӕрстыты ӕмӕ референдумы цыдмӕ, ницы серьезон фӕткхалӕн цаутӕ рафӕлгъаудтой ӕвзарӕн фадгуыты, загъта УФ ЦӔК-ы уӕнг Сиапшах Шапиев.
Республикӕйы президентон ӕвзӕрстытӕм сӕ хъус дарынц 80 ӕхсӕнадӕмон цӕстдарӕджы дунейы ӕхсӕз бӕстӕйӕ. Уыдон ныры онг ницы фӕткалды тыххӕй фехъусын кодтой.
"Мах бабӕрӕг кодтам 20-ӕй фылдӕр ӕвзарӕн фадыджы, уыдон нымӕцы районты дӕр. Фадгуытӕ иууылдӕр байгом сты рӕстӕгыл, сты дзы алкӕцы кандидаты минӕвӕрттӕ дӕр. Мах банысан кодтам ӕвзарджыты активон ӕрбацыд, фӕткхалӕн цаутӕ бӕрӕг не рцыдысты", — загъта Шапиев.
Уый ма банысан кодта, ЦӔК иттӕг хорз кӕй бацӕттӕ кодта ӕвзӕрстытӕ, уыдон уагъд цӕуынц бӕрзонд ӕмвӕзадыл.
Президентон æвзæрстытæ æмæ республикæйы ном раивыны фæдыл референдум уагъд цæуынц 77 æвзарæн фадыджы. Уыдонæй 72 æрбайгом Хуссар Ирыстоны территорийыл, æртæ — Цæгат Ирыстоны, фæйнæ иу та — Мæскуы æмæ Сухумы минæварадты.
