ЦХИНВАЛ, 9 апр — Sputnik, Козаты Диана. Централон æвзарæн къамис фехъусын кодта æвзарджыты радон нымæц, 16 сахаты бæрæггæнæнтæм гæсгæ æвзарджыты 69,95 проценты.
ЦӔК сæрдар Плиты Беллайы информацимæ гæсгæ, Цхинвалы схъæлæс кодта 67, 8 проценты, Цхинвалы районы — 68,85 проценты, Знауыры районы — 80,49 проценты, Ленингоры районы — 81,04 проценты, Дзауы районы — 67,20 проценты.
Хуссар Ирыстоны æддейæ æвзарæн фадгуыты бæрæггæнæнтæм гæсгæ, æдæппæт схъæлæс кодта 4800 адӕймаджы, уыдонæн сæ фылдæр хай Цæгат Ирыстоны.
"Нæ бæрæггæнæнтæм гæсгæ, иу фадыджы ма баззад 200 бюллетены, аннæйы та — 160. Æдæппæтæй арвыстам 6000 бюллетены", — загъта Плиты Белла.
Президентон æвзæрстытæ æмæ республикæйы ном раивыны фæдыл референдум уагъд цæуынц 77 æвзарæн фадыджы. Уыдонæй 72 æрбайгом Хуссар Ирыстоны территорийыл, æртæ — Цæгат Ирыстоны, фæйнæ иу та — Мæскуы æмæ Сухумы минæварадты.
Ӕвзæрстытæм сæ хъус дарынц 80 æхсæнадæмон цæстдарæджы Уæрæсейæ, Днестргæрон республикæйæ, Хæххон Карабах, Донецк æмæ Луганскы адæмон республикæтæй.
