ЦХИНВАЛ, 8 май — Sputnik. Хуссар Ирыстоны Мидхъуыддæгты министрады хисæрмагонд сконд рахызт службæ хæссыны фæтыхджындæргонд режиммæ Уæлахизы Боны цытæн мадзæлтты фæдыл, загъта Sputnik уагдоны сæргълæууæджы хæдивæг Пухаты Мераб.
Уый бафиппайдта, æхсæнадон фæткмæ Цхинвалы сæ хъус кæй дардзысты МХМ-ы 270 кусæджы. Уымæй дарддæр ма милицийы уæлæмхас дæлхайадтæ æрвыст æрцыдысты республикæйы арæнгæрон районтæм.
"Нæ кусджытæ сæ бынæтты слæудзысты цытджын мадзæлттæ райдайыны размæ æмæ сæ хъус дардзысты фæткмæ суанг 9 майы изæры онг", — загъта Пухаты Мераб.
Хуссар Ирыстоны уагъд цæуынц Стыр Уæлахизыл 72 азы сыххæсты цытæн мадзæлттæ. 9 майы Цхинвалы уагъд æрцæудзæн æфсæддон парад, уый фæстæ горæты сæйраг фæзуатыл рацæудзысты республикæйы цæрджытæ Стыр Фыдыбæстæйон хæсты хайадисджыты къамтимæ — акци "Ӕнæмæлгæ полк"-ы хайад райсдзысты 5 мин адæймагæй фылдæр.
Бæрæгбонон мадзæлттæ балхынцъ уыдзысты концертæй Цхинвалы театралон фæзуатыл.
