ЦХИНВАЛ, 12 май — Sputnik, Хъотайты Мария. Хуссар Ирыстоны парламенты президиум æмхъæлæсæй сразы ис республикæйы хицауады сæрдары бынатмæ президенты æрбавдыстгонд Пухаты Эрикы кандидатурæимæ.
Ивгъуыд майрæмбон Президент Бибылты Анатолий бавдыста парламентмæ Пухаты Эрикы кандидатурæ Хуссар Ирыстоны премьер-министры бынатмæ. Пухаты Эрик ныртæккæ æххæст кæны вице-премьеры хæстæ.
Президиумы уæнгтæ — вице-спикертæ æмæ парламетон комитетты сæргълæуджытæ — сразы сты Пухаты Эрикы кандидатурæйыл, уый премьерæй сфидар кæныны фарстыл та уынаффæтæ цæудзысты къуырисæры хицауады закондæттæн органы сессийыл.
Хуссар Ирыстоны хицауад суæгъд кодта йе ′ххæстбартæ 24 апрелы, ног президент Бибылты Анатолий йæ бынатмæ куы бахызт, уымæй æртæ боны фæстæ. Министрæдты сæргълæуджытæ æххæст кæндзысты сæ хæстæ ног командæйы сырæзты онг.
